Мал басу азайды

Аса қауіпті аймақ саналатын темір жолда қараусыз жайылған төрт түліктен төнген қауіп азаймай отыр. Атырауда биылғы жарты жылда машинистер 23 шұғыл тежеу беріп, 18 мал басу оқиғасы орын алған.

Атырау жүк тасымалы бөлімшесінің қозғалыс қауіпсіздігі бойынша инженері Мақсот Дүйсалиевтің айтуынша, былтырғы жылғы осы мерзіммен салыстырғанда мал басу 13 оқиғаға азайған. Азайды дегенмен, жағдай оңала қоюы екіталай. Жол бойында мал әлі де көп. Мал басу көбіне жаз айларында болатыны белгілі. Соған сәйкес тек маусым айында 8 мал басу оқиғасы тіркелген.  

– Әсіресе қауіпті саналатын жерлер: Атырау – Махамбет, Махамбет – Қызылжар, Бақсай – Аққыстау, Құлсары – Шоқпартоғай, Жантерек – Мұқыр – Сағыз, Ганюшкино – Атырау аралықтары. Бұл мәселелерді жергілікті атқарушы және құқық қорғау органдарының қарым-қатынасынсыз шешу мүмкін емес. Соған орай аудан әкімдеріне малды теміржол бойына жаймау, бақташы қою, мал иелеріне ескерту жұмыстарын жүргізу жөнінде талай хат жазылып жатыр, бірақ нәтиже көңіл көншітерліктей емес. Мал бағу ережелері туралы мыңдаған адамға ескерту, жадынама берілсе де, жол бойындағы малдың кесірінен машинистер пойызды шұғыл тоқтатуға мәжбүр. Оның өз зияны бар – тепловоз тұрып қалады, бүлінеді, уақыт кетеді, вагон аударылу қаупі де бар, жолаушылар жарақат алады, т.б. Халық малға ие болуы керек, онсыз осылай жалғасқаны – жалғасқан, – дейді бөлімше инженері.