Бурыл станциясында «Қауіпсіз өткел» акциясы өтті

Тараз қаласындағы жүк вагондарын сұрыптайтын 2-санаттағы Бурыл станциясында күзетілмейтін үш өткел, тақ және жұп 8 негізгі жолдан бөлек 48 кірме жол бар. Жолаушылар пойыздары өтетін басты магистральдық жолдан шеткері жатқанымен, мұнда жүк пойыздарының қозғалысы өте жоғары. Әсіресе маневрлік жұмыстар мен жүк өңдеу процестері кезінде өткелдерде қауіп-қатер арта түседі.

«ҚТЖ» ҰК» АҚ «Жамбыл магистральдық желі бөлімшесі» филиалы және Жамбыл локомотив пайдалану депосы бірлесіп, Бурыл станциясының өткелдерінде «Қауіпсіз өткел» профилактикалық акциясын өткізді. «Заң мен тәртіп» тұжырымдамасы аясында өткелдердегі жол-көлік оқиғаларының алдын алу мақсатында ұйымдастырылған іс-шараға Тараз станциясындағы Көліктегі полиция бөлімі де атсалысты.  

Акция барысында көлік жүргізушілері мен жаяу жүргіншілерге өткелдерден өту кезінде сақталуы тиіс ережелер түсіндірілді. Жамбыл локомотив пайдалану депосы бастығының орынбасары міндетін атқарушы Вадим Королев қауіпсіздік талаптарын сақтау – көлік жүргізушілерімен қатар локомотив бригадалары үшін де ортақ міндет екенін алға тартты. Маневрлік жұмыстар кезінде машинистерге қауіпсіз еңбек жағдайын жасаудың маңыздылығын еске салды.  

Ал Тараз станциясындағы Көліктегі полиция бөлімі әкімшілік полиция бөлімшесінің бастығы, полиция аға лейтенанты Сералы Кембаев жыл басынан бері ҚР Әкімшілік құқық бұзушылық туралы кодексінің 559-бабы талаптарын бұзған 1600-дей азамат әкімшілік жауапкершілікке тартылғанын айтып, темір жолды кесіп өту кезінде қауіпсіздік ережесін бұзғандарға алғаш ауызша және жазбаша ескерту беріліп, хаттама толтырылатынын ескертті.

– Сонымен қатар Тараз станциясындағы Көліктегі полиция бөлімінің қызмет атқару аумағында 10-14 тамыз күндері аралығында «Көліктегі құқық бұзушылыққа жол жоқ» жедел-профилактикалық іс-шарасы өткізілуде. Мақсат – теміржол көлігі нысандарында құқық бұзушылықтардың алдын алу, қоғамдық тәртіпті сақтау, азаматтардың қауіпсіздігін қамтамасыз ету және құқық бұзушылықтарға жол бермеу. Екі апталық іс-шаралар кезінде теміржол вокзалдары, жолаушылар пойыздары, перрондар мен теміржол инфрақұрылымы нысандарында профилактикалық жұмыстар күшейтіліп, құқық бұзушылықтар мен әкімшілік сипаттағы заң бұзушылықтарды анықтау және алдын алу бағытында тиісті жұмыстарды жүргіземіз. Сонымен қатар жолаушылар мен теміржол нысандарына жақын орналасқан елді мекен тұрғындарына қауіпсіздік талаптарын түсіндіреміз, ал талап – баршаға ортақ, – дейді Сералы Ералыұлы.