Түрксібтің төл туындысына – 95 жыл
Абай облысы бойынша меншікті тілші
Ел шығысындағы теміржол саласында маңызды да мазмұнды тарихы бар іргелі мекемелердің бірі – Семей белгі беру және байланыс дистанциясының құрылғанына биыл 95 жыл толып отыр.
Осыған орай жуырда ШЧ-29 мекемесінде кең көлемде мерекелік іс-шара ұйымдастырылды. Салтанатты жиынға дистанцияның кешегі-бүгінгі қызметкерлері мен ардагерлер қауымы, Семей магистральдық желі бөлімшесінің басшылығы қатысып, мерейтойды жоғары деңгейде атап өтті.
Мерекелік басқосуды ашқан дистанция директоры, Құрметті теміржолшы Бейбіт Түменғали көпшілікті байырғы мекеменің мерейтоймен құттықтап, кешегі-бүгінгі тарихына шолу жасады.
Түрксіб теміржолының төл туындысы саналатын мекеменің әр жылдардағы жетістігін, бүгінгі цифрландыру дәуіріндегі қол жеткізілген мақсатты шаралар қатарын кеңінен сөз еткен ол осынау жеңісті жолда сала ардагерлері еңбектерінің де айрықша екендігін баса атап өтті.
Сөз кезегі қонақтарға беріліп, бөлімшенің салалық ардагерлер ұйымының төрағасы, Құрметті теміржолшы Қырықбай Әлсейітұлы құттықтау лебізін білдірді.
Ал дистанцияның ардагерлер қауымының атынан осы мекеменің бастауыш ардагерлер ұйымының төрағасы, «Түрксіб-Семей» мұражайының Құрметті директоры, Құрметті теміржолшы Мақсұт Көшжанов мазмұнды баяндама жасады. Қоғамдық істе белсенді қария дистанцияның арғы-бергі тарихына тоқталып, өзі көзін көрген даңқты тұлғалар жайында тамаша естелік айтты.
Мерекелік шарада НЖС-6 басшысының бірінші орынбасары Азат Беркімбаев, «Қазкөліккәсіп» ҚБ Семей өңірі бойынша төрағасы Есен Қажығұловтар да сөз алып, ізгі тілектерін білдірді.
Десекте, кез келген мерекенің сәнін марапаттау кіргізетіні де рас. Бұл орайда «Семей белгі беру және байланыс дистанциясына – 95 жыл» мерекелік төсбелгімен мекемеде әр жылдарда жемісті еңбек еткен ардагерлермен қатар ШЧ-29 мекемесінің жетекші инженері Берікқан Қозыбақов сынды аймақтағы байланыс саласының бабын тапқан көптеген майталман мамандар марапатталды. Мерекелік көңіл күй ән шашумен ақ дастарханмен басында жалғастық тапты.
