Ақтоғайдан Дегелеңге дейін...

Семей теміржолындағы маусымдық жұмыстар жылдағы қалыптасқан дәстүр бойынша күзгі комиссиялық байқаумен қабат жалғасуда. Қыркүйек айының 13 күні басталып, 29 күні аяқталатын дәстүрлі байқау жазғы жұмыстар мен алдағы қаһарлы қысқа даярлық барысын толыққанды пысықтауда.

Комиссия мүшелері, барлық шаруашылық ревизорлары мен бөлімше басшылығы арнайы қызметтік вагонмен өз жұмысын Ақтоғай станциясының іргесіндегі төртінші класты Жүзағаш станциясынан бастады. Таң алагеуімнен басталған тексеру, қадағалау, нұсқау беру іс-шаралары тек ымырт үйіріле Аягөз станциясына қоналқыға келумен аяқтады. Тәулік ішіндегі шаралар тым ауқымды болды. Басты мәселелер қатарында жазғы жол күтімінің нәтижесін анықтау, байланыс және электрмен жабдықтау құрылғыларының қысқы маусымға әзірлігін пысықтау, қозғалысшылар біліктілігін сараптау сынды күн тақырыбындағы міндеттер тұрды. Комиссия мүшелері өңірдегі дала өртінің алдын алу сынды мәселелерді де назардан тыс қалдырмады. Қазіргі таңда Ақтоғай мен Аягөз арасында құрғақ шөптің жану фактілері жиілеген. Тілсіз жау желі бойындағы теміржол мүлкіне залал келтірмеуі тиіс.  

«ҚТЖ» ҰК» АҚ Қауіпсіздік департаментінің Семей учаскесі бойынша аймақтық бас ревизоры Темірбек Акчалов бастаған РБ-6 аппаратының жұмысы өнімді болды. Нормативтік-техникалық құжаттамалардан бастап, станция қызметкерлерінің қозғалыс қауіпсіздігін сақтау бойынша білім-білігі де сынға түсті. Ал, НЖС-6 мен Семей ЖТ филиалының өндірістік-техникалық бөлімі мамандары өндірістік ғимараттардың қысқа дайын, талапқа сай болуын тексерді.  

– Жалпы, байтақ желі бойындағы қозғалыс қауіпсіздігін сақтау бойынша әр ай сайын тұрақты түрде талдау жасап отырамыз. Осыған дейін бірқатар мекеме басшыларына орын алған олқылықтарды түзетіп, ақауларды қалпына келтіру және қауіпсіздікті бұзуға себеп болатын фкторларды жою бойынша нұсқаулар берілген болатын. Күзгі сын барысында осы мәселе айрықша назарда ұсталады, – дейді аймақтың бас ревизоры Темірбек Иманғабасұлы.  

Күзгі сын қарсаңында Аягөз өңіріндегі барлық станция тыңғылықты даярлық жүргізгені байқалады. Күзгі сенбіліктер ұйымдастырылып, ғимараттар ағымдық жөндеуден өткізіліп, рельс бойы қураған шөп пен бұтадан толық тазартылған. Шаруашылық ревизорлары қанша үңіліп «майшаммен» қарағанымен тиянақты жұмыстар легі өз нәтижесін беруде. Жүзағаштан бастап, Темекілі, Алтынқолат, Таңсық сынды жол айрықтары түгел сүзіліп, жергілікті теміржолшылар күзгі сынға толық даярлықпен келгендерін іс жүзінде көрсетті. Сонымен қатар, сала қызметкерлерінің қыс қарсаңындағы керек-жарағын «Қазтеміржолкөлік» ҚБ Семей өңірі бойынша өкілі Есен Қажығұлов та түгендеуде.  

Күзгі байқау осы аптада Аягөз-Жаңғызтөбе-Шар телімінде жалғасатын болады. Ал, жалпы комиссиялық бақылау Өскемен өңірін де қамтып, 29 қыркүйек күні кластан тыс Семей станциясында аяқталмақ. Анықталған жайттар қорытынды селекторлық жиын барысында талқыға салынады.