Семей станциясында қауіпті өткелдер бақылауға алынды

Қыркүйек айы басталысымен Семей станциясының қозғалыс қызметі мен желілік полиция қызметкерлері қырағылықты біршама арттырды. Алаңдауға негіз бар. Семей вокзалындағы құрылыс жұмыстарына байланысты ескірген жаяу жүргіншілер көпірі 3-ші маусымнан бастап уақытша орнынан алынған болатын. Оның орнына заманауи жаңа көпір тұрғызылғанға дейінгі аз уақытта желі бойындағы  тұрғындардың, әсіресе мектеп пен колледж оқушыларының қауіпсіздігі басты орынға шықты.  

Дегенмен төте жол тапқысы келгендер үшін станция басын кесіп өтуге жол жабық. Тоқтап тұрған вагондардың астымен өтіп, уақыт ұтуды жөн санайтындар қырағы көздерден ары аса алмайды. Әсіресе, бұрынғы көпірдің маңайы жіті бақылауда тұр. Бұл ретте қауіпсіздік іс-шаралары жаңа оқу жылының басталуымен бірге әдеттегіден тыс күшейтілген.  

Соның ішінде әсіресе теміржолшылар қауымының жүктемесі артып отыр. Атап айтсақ, «ҚТЖ» ҰК» АҚ-ның Басқарма Төрағасының орынбасары М.А.Шәкеновтың  №0002 жеделхат-нұсқауы аясында профилактикалық жұмыстар қатары да жиі жүргізілуде. Мәселен жуырда Семей станциясының бас инженері Бекзат Кәрімханов  бастаған үлкен топ станцияға жақын орналасқан тұрғынүйлерді аралап, түсіндіру-ақпараттандыру жұмыстарын жүргізді. Семей ЖТ бөлімшесі филиалының қозғалыс қауіпсіздігі қызметі, желілік полиция бөлімі мен әскерилендірілген теміржол күзеті басшылығымен бірлесіп жүргізілген іс-шарада жеке сектор тұрғындарына ескерту қағаздары таратылып, ақпараттандырылды.

Сонымен қатар, станция басына шығатын жолдардың бойынан жүргіншілерді күтіп алған топ өкілдері жекелей де әңгімелесулер жүргізді. Қауіпсіздік ережелерін кеңінен түсіндіріп, сауалдарына да жауап берді.

– Теміржол – аса қауіпті аймақ әрі қателікті кешірмейтінін әрдайым еске салумен келеміз. Өмір – адамға бірақ рет берілетін баға жетпес сый. Мұндай іс-шаралар әрине алдағы уақытта да өткізіле беретін болады. Ал, станция басындағы қауіпсіздік қазіргі таңда басты орында тұр, – дейді бұл ретте осынау акцияның басты ұйымдастырушысы Семей станциясының бас инженері Бекзат Нұрланұлы.

Бір қуантарлығы әзірге тосын оқиғалар орын алған жоқ. Тек ұзындығы бірнеше шақырымға созылып жатқан станциялық жолдардың бойынан әр жерден сирек те болса тәртіп сақшыларының ысқырығын естуге болады.