Қауіпсіздікті қамтамасыз етуді бірлесе еңсермек
Бүгін Сексеуіл жол дистанция басшылығы жергілікті теміржол саласы мекемелерінің басшыларымен құқық қорғаушы органдар өкілдері және жергілікті атқарушы орган мамандарымен пойыздардың қозғалыс қауіпсіздігі шараларын арттыру мақсатында дөңгелек стол басына жиылып, кездесу өткізді.
Кездесуге теміржолшылардан бөлек Сексеуіл кенті әкімінің орынбасары мен Желілік полиция бөлімінің инспекторы, жергілікті мектеп директоры мен тәрбие ісі жөніндегі орынбасарлары, Сексеуіл жол дистанциясының барлық телім басшылары қатысты.
Дөңгелек стол басына жиналғандардың басты мақсаты – Сексеуіл жол дистанциясы телімдері бойында жайылатын қараусыз жайылған малдың рельс үстіне шығып, тепловоз машинистерінің жедел тежегіш басуының алдын алу, мекеме мүліктерінің ұрланбауын мен зақымданбауын қадағалау, мектеп оқушыларын теміржол бойындағы қауіпті аймақтармен таныстыру, жергілікті ауылдық округ тұрғындарымен профилактикалық жұмыстарды үздіксіз жүргізу, жалпы алғанда аса қауіпті аймақ саналатын теміржол бойында ешкімнің зардап шекпеуіне жағдай жасауды кеңінен талқыға салу болды. Және де осы жиынға қатысушылардың әрқайсысының пойыздардың қауіпсіз қозғалысына кедергі келтіретін тосын жағдайлардың алдын алуға үлес қосуын талап ету болды.
– Жол дистанциясы бойынша бүгінгі күнге дейін, яғни 9 ай 25 күннің ішінде дистанция телімдерінен жүріп өткен тепловоз машинистері жол бойында жайылған малдың кесірінен 77 мәрте жедел тежегіш басуға мәжбүр болған. Оның 9 жағдайында мал пойызға басылған, қалған жағдайда келеңсіздіктің алдын алуға мүмкін болған. Осы жағдайларға байланысты ЦЖСБ-19-20/24 ЦЖС Кенжебековтің, АУР/392-И НЖС Басықараевтың жеделхаттарына сәйкес Сексеуіл жол дистанциясында дөңгелек стол ұйымдастырылып отыр. Жедел хатта көрсетілген шаралардың орындалуына жұмыс жасап жатқан жолшыларға өз құзіреттеріңіз шегінде көмек қолын созуларыңызды сұраймыз, – дейді жиналғандарға қарата Сексеуіл жол дистанциясының басшысы Мәжит Құрманбаев.
Дистанция бойынша қараусыз малдың жол бойына жақындамауының алдын алу үшін жолшылар тұрақты жұмыс жүргізіп келеді. Мәселен, осы айдың өзінде пойыздардың қауіпсіз қозғалысын сақтау шараларын арттыру мақсатында дистанция ұжымы тарапынан ауылдық округ әкімдігіне қатынас хаттар жолданса, жергілікті әкімшілік және құқық қорғау өкілдерімен бірлесіп мектеп оқушыларымен, ауыл тұрғындарымен кездесу ұйымдастырылып, теміржолдың қауіп-қатерлі аймақ екендігі тағы да түсіндірілген. Осындай профилактикалық шаралар Қарақұм, Шижаға, Күршек ауылдарында, Арал қаласы және Сексеуіл кентінде жергілікті тұрғындармен өткізілсе, №13, 87, 231 және 59 орта мектептерде оқушылармен кездесу өткен.
Дистанция ұжымы жергілікті тұрғындармен жүргізіліп жатқан жоғарыдағы жұмыстардың бәрі аса нәтижелі болмаған соң, бүгін міне, мүдделі тараптардың басын қосып дөңгелек үстел ұйымдастырып отыр. Жиынға қатысушылар теміржолды малдан қорғау үшін қоршауларын салу, жергілікті полиция бөлімшесінің қосымша тіркеу жұмыстарын жүргізу, мал дәрігерлерінің барлық малға ен қойып, сырға салынуын жүргізуі секілді мәселелерді ақылға салып, талқыға түсірді. Және де ауылдық округтердің әкімдігі мен мектеп басшылығы тарапынан алдағы уақытта өтетін кездесулерді ұйымдастырып, мамандарды қатыстыруға үлес қосуы айтылды. Осындай кездесулермен қатар қосымша «Теміржол – қауіпті аймақ», «Жол белгілері арқылы өту» тақырыптарында таныстырылымдар өткізіп, қосымша теміржол көлігінен жарақаттанудың алдын алу, өтпелерден өту қағидалары, иесіз зат табылған жағдайда қандай шешім қабылдау керек, теміржол аймақтарында тыйым салынатын нәрселер төңірегінде түсіндіру жұмыстарын күшейту керектігі кеңінен талқыланып, алдағы уақытта осы жұмыстардан нәтиже шығаруға уағдаласып, осы сарында қаулы қабылдады.
Сабырхан СЕЙІЛБЕКҰЛЫ, Сексеуіл станциясы