Техникалық оқу – айрықша назарда
Қызылорда локомотив пайдалану депосында өткізілетін техникалық сабақтардың сапасын арттыру және тиімділігіне басымдық беру мақсатында биылғы 1 қарашадан бастап «Техникалық оқуға айрықша назар бөлу» айлығы жарияланды.
Айлық жарияланған сәттен бастап мекеменің жұмыс орындарында айлықтың жарияланғаны жайлы аншлагтар ілініп, жұмыс жоспары түзілген. Арнайы айлықтың өту барысын бақылайтын арнайы бақылаушы құрам бекітіліпті. Кәсіби мамандардан іріктелген топ оқыту шеберлері мен нұсқаушы-машинистердің өндірістік оқыту конспектілерінің толтырылуын тексеріп, олардың жеке құрамммен теориялық, тактикалық және практикалық тұрғыда сапалы сабақ өткізуін бақылауға алған.
– Бұл айлық «ҚТЖ-ЖТ» басшылығының үстіміздегі жылдың 30 қазан күнгі берілген ГПГ/11024-И факсограммалық жеделхаты мен «ҚТЖ» ҰК» АҚ Қозғалыс қауіпсіздігі департаменті басшылығының №ЦЗБ-05-06/33 хаттамасы негізінде қолға алынып отыр. Осыған орай, Қызылорда локомотив депосының басшылығы арнайы бұйрық шығарып, теміржолшылардың білімі мен біліктілігін арттыру жұмыстарына кірісіп кеттік. Негізгі басымдық техникалық, өндірістік оқытуға беріліп отыр. Осыған орай өзіміздің теориялық білімімізді қайта пысықтап, дайындықты қабат жүргізудеміз, – дейді депоның оқыту жөніндегі машинист-нұсқаушысы Мақсұт Сейітов.
Теориялық және техникалық білім айрықша назарға алынған айлық барысында нұсқаушы-тәлімгерлер берген сабақтардың сапасы, бақылаушылар тарапынан сабаққа қатысушылардан өткен тақырыптар жайлы сауалдар қою арқылы үш мәрте тосын тексерумен анықталмақ. Және де локомотив бригадаларының стандарттан тыс және апатты жағдайлардан жол тауып шыға білуі жайлы бейнетаспа түсіріледі. Техникалық сабақ өткізілетін кабинеттер оқу стендімен, макеттермен және қосымша пайдаланылатын құрал-саймандармен толықтырылатын болады. Мұның барлығы жылжымалы құрамдардың қозғалыс қауіпсіздігін сақтау шараларын арттыра түсері анық.
Сабырхан СЕЙІЛБЕКҰЛЫ, Қызылорда
Суретті түсірген автор