Түркістан станциясының басшысы үздік деп танылды
«ҚТЖ – Жүк тасымалы» АҚ «Шымкент ЖТ бөлімшесі» филиалында станция басшылары арасында ТПЕ, ПҚН, ТСН ережелері және компанияның өндірістік қауіпсіздік стандарттарына қатысты білім-білігін сынайтын арнайы байқау өткізілді.
Аталған байқау жоспарға сәйкес, 2018 жыл – станция бастығы жылы аясында ұйымдастырылып отыр. Шараға оңтүстік аймақтағы ірілі-ұсақты он шақты станция басшылары қатысты. Сонымен станция басшылары өткізіліп отырған байқауға барын салып, белсене қатысты. Олардың арасында ондаған жыл тәжірибелері бар, жастардың ұстазына айналып үлгерген теміржолшылар – Түркістан станциясының бастығы Қ.Сырлыбековті, Шымкент станциясының бастығы Б.Абдуллаевты, Қызылсай станциясының бастығы Б.Раманқұловты, Күншағыр станциясының бастығы М.Түкібаевты және Састөбе станциясының бастығы Е.Маймақовты ерекше атап өткен жөн.
Байқау екі кезеңнен тұрды. Бірінші кезең – байқауға қатысып жатқан станция басшыларының теориялық білімін тексеру мақсатында жазбаша тестілеу өткізілді. Онда техникалық пайдалану ережелерінің талаптары, теміржол көлігіндегі пойыздар мен маневрлік жұмыстардың қозғалысы бойынша нұсқаулықтар, сигнализация және белгі беру бойынша нұсқаулықтар, Компанияның өндірістік қауіпсіздік стандарттары сұралды.
Екінші кезеңде – үздік үш үміткер комиссия мүшелерінің қойған сұрақтарына жауап берді. Қойылған сұрақтар легі, әрине, қозғалыс қауіпсіздігіне байланысты. Мысалы, стандартты емес ахуал туындаған кезде пойыздардың қозғалысына байланысты жұмысшылардың әрекеті және Компанияның өндірістік қауіпсіздік стандарттарын егжей-тегжей біліп, айтып беру, т.т. сынды.
Сонымен байқаудың қорытындысы бойынша сынақта үздік нәтиже көрсеткендер де белгілі болды. Олардың көшін бастағандар Түркістан станциясының басшысы Қ.Сырлыбеков, Күншағыр станциясының басшысы М.Түкібаев, Састөбе станциясының басшысы Е. Маймақов.
Байқаудың қорытындысы бойынша бірінші орынды жоғарыда аталған көрсеткіштер бойынша Түркістан станциясының басшысына берілді. Екінші орынды Күншағыр, үшінші орынды Састөбе станциясының басшысы жеңіп алды.
Үздік станция басшыларын марапаттау Түркістан станциясының тораптық жиынында салтанатты түрде өткізілді. Марапаттау рәсіміне бөлімше басшылары, локомотив және вагон депосының басшылары, локомотив бригадалары, станция жұмысшылары және де Түркістан теміржолы торабының теміржолшылары қатысты.
Байқаудың мақсаты – станция басшыларының кәсібилігі мен жауапкершілігін арттыру, еңбек және технологиялық тәртіпті күшейту, өндірістік қауіпсіздікті қамтамасыз ету және станция басшысы қызметінің корпоративтік деңгейін жоғарылату.
Жансая СЫДЫҚБАЙ, Шымкент
Суретті түсірген автор