Облыс орталығына айналған Түркістан қаласы қайта жаңғыруда
Бүгінде облыс орталығына айналған Түркістан қаласы қайта түлеп, қайта жаңғыруда. Түркістанға теміржол тартылғалы бір ғасыр. Бүгінде тоғыз жолдың торабын түйістіріп отырған көне Түркістан станциясы жаңа облыс орталығының мәртебесін көтерісуге атсалысуда.
Себебі, бүгінде үлкен көші-қон мен ауыс-түйіс, одан қалды ауқымды құрылыс аумағына айналған көне қалаға жан-жақтан ағылған жүк көлемі күрт артқан. Жүк тасымалдаушылар мен жолаушылардың басым бөлігі темір жол қызметін пайдаланады. Бұл тұрғыда Қадыр Сырлыбеков басқаратын Түркістан станциясы теміржолшыларының ерен еңбегін ерекше атап өтуге тиіспіз.
Қызылорда – Шымкент жол бөлімшелері арасындағы шекаралық бекет атқаратын жұмысына қарай телімдік станция болып есептелсе, ал жұмыс көлеміне байланысты І класты станцияға жатады. Станцияда 16 жол бар, 2 парктен тұрады. Біріншісінде, пойыздарды қабылдап-жөнелту паркі, яғни 1-8 жолдар. Екіншісі, сұрыптап-жөнелту паркі, яғни 9-16 жолдар. Түркістан – Шорнақ және Түркістан – Шойтөбе аралығы 2 жолды біржақты автоблоктаумен жабдықталған.
Станция басшысының операциялық жұмыс бойынша орынбасары Мүтәліпжан Шариповтың айтуынша, станция блокты БМРЦ орталықтандыру жүйесімен жабдықталған, электрлік орталыққа 65 сигнал, 71 бағыттамалы бұрма кіргізілген. Станция төмен қуатты сұрыптау дөңесімен жабдықталған. Дөңес станцияның тақ бағытында орналасқан. Маневрлік сұрыптау жұмыстары 2-ТЭМ екі тепловозымен жүргізіледі.
– Түркістан – Қызылорда және Түркістан – Арыс бағытына телімдік немесе құрама пойыздар құрастырылады. Іргедегі Кентау қаласы бағытына өндірістік темір жол желісі жалғанған. Вагондарды өндірістік телімге өткізу үшін бұл жұмыстар Борисовка станциясында жүзеге асырылады. Станция ұжымы өткен жылы өнімді жұмыс істеді деп айтуға толық негіз бар. Жүк тасымалы жоспары 136 пайызға, жүк түсіру жоспары 110 пайызға орындаса, вагон айналымы 103 пайызға, пойыз қабылдау мен жөнелту – 100 пайызға, бір жүк операциясында вагонның бос тұруы 104 пайызға орындалды. Станцияда 133 адам еңбек етеді, 70 пайызын жасы елуден асқан тәжірибелі теміржолшылар құрайды, – дейді М.Шарипов.
Күре жолдың бойында жатқан көне станция арқылы батыс пен шығысқа ерсілі-қарсылы жүйткіген жүк және жолаушы құрамалары жыл он екі ай бір тынған емес. Жолаушы құрамдары қатарында «Түркістан – Астана», «Түркістан – Алматы» бағытындағы «Тальго» жүйрік пойыздары – барша түркістандықтардың мақтанышы. Сонымен қатар, «Түркістан – Қызылорда» және «Түркістан – Шымкент» қалааралық жолаушы пойыздары да әрі-бері қатынаған екі облыс халқының қажетіне жарап тұр.
Станцияда шоғырланған вагон және локомотив депосы, жол дистанциясы сынды барлық салалық кәсіпорындар теміржол көлігінің қауіпсіз қозғалысы үшін бір-бірімен қоян-қолтық жұмыс жасап, оңтүстіктің ордасына айналып келе жатқан қаланың жаңа келбетін қалыптастыруға өз үлестерін қосуда.
Жансая СЫДЫҚБАЙ
Суретті түсірген автор