Қанағаттанарлық деп баға берді
Маңғыстау жүк тасымалы бөлімшесі кәсіподақ ұйымының өткен жылғы атқарылған жұмыстары қандай? Биылғы жылғы жоспарлары жайлы не білеміз? Бұл туралы бөлімшеде өткен кәсіподақ ұйымының конференциясында айтылды.
Конференцияда Маңғыстау жүк тасымалы бөлімшесі кәсіподақ комитетінің төрағасы Әзірбай Тұрмағанбетов 2018 жылы атқарылған іс-шаралар, Ұжымдық шарттың орындалысы жөніндегі кең көлемді баяндама жасады.
– Ұжымдық шарттың орындалуы, еңбек заңдылықтарының сақталуы, еңбек қорғау жұмыстарының ұйымдастырылуы, кәсіподақ мүшелерінің әлеуметтік жағынан қорғалуы басты назарда ұсталды. Оның ішінде үлкен цехтық ұйымдар мен топтық тиіс кадр, есеп, экономика бөлімдері жұмыстары комитет бекіткен жылдық жоспарға сай тыңдалып отырды. Комитет жыл сайын шағын станция, бекеттердің әлеуметтік-тұрмыстық жағдайлары жайлы анықтама-талдау дайындап, орындалысы туралы тиісті орындарға жеткізіп келеді. Өзге кәсіпорындар секілді біздің теміржолшылар да ұжымдық шарттағы еңбек қауіпсіздігі мен оны қорғау, өтемақылар, демалыс, әлеуметтік кепілдіктердің жеңілдіктері туралы жаңа ұжымдық шарттың нақты бекітілгені жайлы күшіне енгеннен бері жұмысшы-қызметкерлерге таныстырылып, орындалысы қадағалануда, – деді Ә.Тұрмағанбетов баяндамасында. Айтуынша, өткен жылы бірде-бірі теміржолшы жұмыстан қысқартуға ұшырамаған. Кәсіподақ комитеті жұмысшылардың уақытылы еңбек демалысына шығуын, жеке еңбек шартының бұзылмауын, тәртіптік шараның орынды берілуін қадағалап отырады. Жұмысшы-қызметкерлерге қолданылатын тәртіптік шараның заң шеңберінде берілгені қадағаланады.
Бөлімшеде құрылған әлеуметтік мәселелер жөніндегі алқаның шешімімен тек 2018 жылдың өзінде ұжымдық шартта көрсетілген балалы болған 298 адам, туғаны қайтыс болған 63 адам материалдық көмек алыпты. Сондай-ақ, тиісті жұмыс өтіліне сай 53 жұмысшы-қызметкер, 17 зейнеткер, мерекелік жасқа толған 20 жұмысшы, 13 зейнеткер, 726 балаға материалдық көмек берілген. 53 мүгедек баласы бар теміржолшыға жәрдемақы, үйленген 52 жас отбасыға көмек берілген. Материалдық көмек бөлімшенің кәсіподақ ұйымымен бірге теміржолшылар кәсіби одағы Орталық кеңесінен де беріліп келеді.
2018 жылы 192 бала жазғы лагерьде демалды. Бұл өткен жылдан 70 жолдама артық деген сөз. 2017 жылы 29 жұмысшы шипажайда демалса, 2018 жылы 203 жұмысшы-қызметкер және 36 зейнеткер республиканың әртүрлі шипажайларына жолдама алған.
– Өткен жылы теміржолшылар жалақысы 10 пайызға өсірілді. Орталық Кеңес теміржолшылар кәсіподағы басшылығы бастауыш ұйымдардың ұсыныс-пікірлерімен санаса отырып, қабылданған жаңа Ұжымдық шарттағы тиісті жеңілдіктерді сақтап қалды. Бір мысал, біздің ұсынымыз бойынша Орталық Кеңес кәсіби одағы тікелей араласуының арқасында соңғы жылдары мекеме жұмысшылары, оның ішінде пойыз құрастырушы, пойыз қараушы, жөндеуші және машинистерге ай сайын ұсталынып келе жатқан 10 пайыздық зейнетақылық жарнасына қосымша 5 пайыз Жүк тасымалы есебінен қосып аударып келеді, – деді баяндамашы.
Өткен жылдың тамыз айында Елбасының «Рухани Жаңғыру» бағдарламасына сәйкес кәсіподақ комитеті қорының қаржысы есебінен көпбалалы, аз қамтылған жалғызбасты отбасылардың 11 баласы Алматы қаласына демалып қайтса, желтоқсан айында теміржолшылардың бір топ баласы Астана қаласында өткен Жаңажылдық шыршаға арнайы шақыртумен барған. Өткен жылы Ақтау қаласында өткен Көлік саласы кәсіподақтарының Бірінші Халықаралық әйелдер форумына бөлімшеден 14 делегат қатысып, ұйымдастыру жұмыстарына кәсіподақ ұйымы тікелей атсалысқан.
Баяндамада еңбек қорғау мәселесі баса айтылды. Бұл жолда кәсіподақ ұйымы қоғамдық бақылауды нығайтып, жұмысшылардың қауіпсіздік еңбек жағдайын жасауға, денсаулығын сақтауға және жақсартуға, өндірістік жарақаттарды азайтуға, жазатайым оқиғалардың алдын алуға жұмыстанып жатқанын жеткізді. Денсаулыққа зиянды жұмыс орнында еңбек ететін жұмысшыларға да тиісті қосымша ақылар төленуде.
– Бөлімшеде еңбек қорғау бойынша көрнекі құралдармен, радиостанциялармен, жұмыс орнындарында салқындатқыш, жылытқыш, қысқатолқынды пеш, электр чайниктері секілді жабдықтармен және жеке қорғау құралдарымен, арнайы жұмыс киімдерімен мүмкіндігінше қамтылған. Жұмыс киімінің сапасы мен уақытында жеткізілуін Орталық Кеңес, бөлімше кәсіподақ филиалы үнемі назарда ұстап отыр, – деді кәсіподақ жетекшісі.
Бастауыш мектебі ғана бар №10 бекетте тұратын теміржолшылар балалары үшін алдағы күндері емдеу пунктін ашуды облыстық, аудандық әкімшіліктерге ұсыныспен шығып, орындалуына ықпал ету жайында өтініш тұрақты назарда ұсталынуда екен. Өткен жылы 10-шы бекет үшін жағымды жаңалық, көптен бері шешілмей келе жатқан ұялы байланыс жүйесі пайдалануға берілген. Алдағы уакытта интернет байланысын Ақтау-Транстелеком арқылы шешу ұйымдастырылуда. Сайөтес станциясындағы мектепке қатынайтын балалар үшін ай сайын Ұжымдық шартқа сәйкес жолақысы төленіп келеді.
Болашақ станциясында теміржолшылар үшін салынған 85 екі пәтерлі тұрғын үй мен әрқайсысы 18 адамға лайықталған 14 вахталық үйде бүгінгі таңда 205 отбасы тұрып жатыр. Тұрғын үйлерді жекешелендіру мәселесін жергілікті әкімшілікпен бірлесіп шешу, банкомат, почта мәселелері, жұмыс күні қатынайтын пойыздың жүру кестесін өзгерту ұсыныстары да әкімшілік, кәсіподақ ұйымының араласуымен оң шешімін тауыпты. Ауыз су мәселесі де күн тәртібінде, жақында 20 үйге интернет желісі тартылған. Жұмысшылардың сумен қамтылуына тоқталар болсақ, бірінші класты станцияларда су мәселесі шешілген. Ал 3, 4, 5 класты станцияларға су «Теміржолсу» мекемесінің көмегімен арнайы цистерналармен тасылып, жеткізілуде.
Әрдайым зейнеткер-теміржолшыларды әлеуметтік қолдау ұжымдық шартқа сәйкес көрсетілуде. Бөлімшеге қарасты 406 зейнеткер қашан да назарда. Тек өткен жылдың өзінде 54 теміржолшыны құрметті еңбек демалысына салтанатты түрде шығарып салуға кәсіподақ ұйымы мұрындық болды. Жуырда құрылған ардагерлер кеңесі алдағы уақытта кәсіподақ ұйымымен бірлесіп жұмыс жасайтын болады.
Кәсіподақтың жылдық жұмысына төрағаның есепті баяндамасы арқылы қанық болған көпшілік сауалдары мен ұсыныс-пікірлерін ортаға салды, бірауыздан кәсіподақ ұйымы жұмысына қанағаттанарлық баға берді.
Әсел ТАҢАТАРОВА, Маңғыстау