Техникалық сабақ Ақтөбе станциясында - тәжірибе алаңы
Ақтөбе станциясы жұмысшыларының қатысуымен теміржол бойында тәжірибелік техникалық сабақ өтті. Онда «Ақтөбе-1» және «Ақтөбе-2» станцияларының теміржолшылар жол бойына шығып, төтенше жағдай кезінде сауатты әрекет ету және ширақ қимылдау ережелерін үйренді.
– Техникалық сабақ әсіресе жаңадан келген мамандар үшін нағыз тәжірибе алаңы болды. Олар қауіпсіз еңбек ету тәртібімен танысып, ақау табылған кезде қалай шұғыл жұмыс жасау керектігін үйренді. Тәжірибе жасап, кезекшінің қандай жұмыстар жасау керектігі көрсетілді. Электрмеханигі келгенше жұмыс жасау тәртібі көрсетілді, – дейді Ақтөбе байланыс белгі беру дистанциясының аға механигі Аязбай Досов. Арнайы форма киген жұмысшылар шұғыл жағдайда қолданылатын отшашуларды пайдаланды. Пойызды тоқтату үшін машинистке берілетін дыбысты іс жүзінде қолданып көрді.
– Станцияға 2018 жылдан 2019 жылға дейін 35 адам қабылданды. Олардың көпшілігі қатардағы пойыз құрастырушылар мен тежегіш табандықтарға бақылау жасаушылар, тағысын тағы жұмысшылар. Бүгінгі техникалық сабақта күнделікті жұмыстарынан басқа шұғыл жағдай болған кезде қандай әрекеттер жасалу керектігі көрсетіліп жатыр. Мұндай шаралар бізде үш ай сайын өтіп тұрады. Қауіпсіздік ережелерінің талаптарын сақтамау – қайғылы жағдайға әкеліп, адамдар қаза тауып жатады. Сондықтан әрбір станция мамандары теміржол бойында тұрақты рейд жұмыстарын жүргізіп тұруы тиіс», – дейді Ақтөбе станциясы бастығының орынбасары Асан Жұмағұл.