Вагон тазалау қызмет қосылды
Ақтөбе облысы бойынша меншікті тілші
Тау-кен байыту комбинатына күнара 50-60 вагон тазартып беретін Дөң станциясының жұмыс көлемі бүгінде 10 есеге ұлғайған. 2020 жылы станция Хромтау өндірісті ауданынан күніне 200 вагон хром рудасын тиеуді жоспарлап отыр.
Хромтау ауданының іргесінде орналасқан Дөң станциясы – өңірдегі жұмыс көлемі ауқымды бірден-бір станция. Қазақстан теміржолы бюджетіне қомақты кіріс әкеліп отырған өндірісті аумақ болашақта жұмыс көлемін ұлғайтпақ. Мекемеде 70-тен аса адам жұмыс жасайды, оның 30 пайызын жастар құрап отыр.
«Негізінен хром тиеу жұмысымен айналысамыз. Күніне 150-200 вагон руда тиеледі. Ақпан айынан бастап вагон тазарту жұмыстарымен айналысатын қызметкерлеріміздің санын көбейтік. Бұрын штатта 9 адам болатын. Қазір «Қазтеміртранс» вагондары көбейді. Жұмыс көлемі ұлғайды. Сол себепті штатқа тағы да 12 адам қостық. Барлығы 21 адам вагон тазарту жұмыстарында жүр. Штатта 72 қызметкер бар. Олардың қатарында пойыз құрастырушы, станция кезекшісі және вагон тазалаушылар бар», – дейді Дөң станциясының басшысы Әнуар Иштаев.
Білгеніміздей, жүк тиелмес бұрын, сатылап вагон тазарту жұмыстары жүргізіледі екен. Осыған дейін тиелген көмір, тас қалдықтар тазартылып, Дөң тау-кен байыту комбинатына беріледі. Тазалықшылар күні-түні жұмыс жасайды. Әр кезекте 5 адамнан. Бес адамның өзі бір кезекте 50-60 вагон тазалап шығады. Келген жүктің тазалығына байланысты 90 вагонға дейін тазартатын кездер болады. Сондықтан вагон тазалау жұмысының өз қиындығы мен жауапкершілігі бар. Ал станциядағы жұмыс жылдан-жылға көбейіп келеді.
«Бұрын зауыттың өз вагондарына тиеп, тек тасымал қызметін атқаратын едік. Қазір Қазтеміртранс вагондарымен жұмысқа көшкеннен кейін вагондарды өзіміз тазалап беріп отырамыз», – дейді басшы.
Станцияда айына 4500 вагонға жүк тиеледі. Негізінен тасымал қазір үш бағытта, Павлодардағы Ақсу бөлімшесі, Россияның Оносова станциясы және Жіңішке бөлімшесіне жөнелтіледі. Себебі бұл өңірлерде хром қорыту зауыттары бар. Дөң станциясы 2020 жылға қарай жүк тасымалын бірнеше есеге көбейтуді жоспарлап отыр. Күніге 200 вагон жүкті жіберу үшін жол кеңейту жұмыстары да күн тәртібінде тұрған көрінеді.
«Жүк көлемі 8-10 есеге артады деп жоспарлануда. Осы талапқа дайын болуымыз керек. Қазір қабылдаужөнелтуге арналған алты жолымыз бар. Күніге 200 вагон жүк жіберу үшін кемі 8 жол болу керек», – дейді өткен жылы облыс бойынша үздік станция бастығы атанған Әнуар Иштаев.