Теміржолшы тұрғындарды өрттен құтқарды

Павлодар ЖТ бөлімшесіне қарасты Екібастұз локомотив пайдалану депосының электровоз машинисінің көмекшісі Ерлан Төлеубаев үлкен қауіп-қатердің алдын алды.

Ол үйіне қайтып келе жатып, Б.Момышұлы көшесінде орналасқан бес қабатты үйдің төбесінің жанып жатқанын байқап қалады. Ерлан дереу өрт қызметіне және полиция қызметкерлеріне қоңырау шалып, тұрғындарды ескерту мақсатында домофондарына қоңырау шалып, дер кезінде эвакуацияны ұйымдастырады. Теміржолшының қырағылығы мен шұғыл әрекет етуінің арқасында тұрғындар аман қалып, өрт ауыздықталды.

«Меніңше, менің орнымда кез келген адам осылайша әрекет етер еді. Өйткені, адамдардың қаза болуы мүмкін еді. Қауіп-қатер бәріне ортақ, мұндай жағдайдан ешкім сақтандырылмаған. Сондықтан бірбірімізге көмектесуіміз керек. ең бастысы, мұндай жағдайда асып-саспау керек. Маған шапшаң әрі дұрыс қимылдауға темір жолда алған білімім көмектесті. Техникалық сабақтарда бізді оқыс жағдайларда сауатты әрі жедел әрекет етуге үйретеді», – деп атап өтті Ерлан Төлеубаев.