Ақмола аймақтың көрсеткіштері көңілден шығады
Ақмола жүк тасымалы бөлімшесі үстіміздегі жылдың бес айын табысты аяқтады деуге толық негіз бар. Оған төмендегі көрсеткіштер куә.
Бөлімше жүк тасымалына қатысты 16 негізгі эксплуатациялық көрсеткіштің 14-нің жоспарын толығымен орындап шыққан. Айталық, пайдаланымдағы жүк айналымы 103,5 пайыздан асып жығылса, жүк вагоны мен жергілікті вагон айналымы 104,4 және 102,5 пайыздарды құраған. Ал жүк тиелген вагонға шаққанда жүк вагонының бос жүрісінің проценті 104,2%-ке орындалған. Яғни, жүк вагондарының бос жүрісін төмендетуге қол жеткізілген.
Сонымен қатар техникалық, телімдік жылдамдықтар, жүк пойызының орташа салмағы сияқты маңызды көрсеткіштердің орындалуы да ойдағыдай. Ақмолалық қозғалыс шаруашылығы мамандары локомотивтердің де жұмысын ұтымды ұйымдастырып, оң көрсеткіштерге қол жеткізген. Оны әсіресе, локомотивтің орташа тәуліктік өнімділігі мен жүрісінен байқауға болады. Бұл екі тапсырманың да орындалуы 102 пайыздан асып отыр. Вагондарға тиелген жүктердің тоннаға шаққандағы жоспары 104,2 пайызды құраса, жүк тиелген вагонның статикалық жүктемесі, жүк вагонының өнімділігі мен жүрісі, 1-техникалық станцияда вагонның тоқтап тұруы сияқты көрсеткіштер де меже үдесінен табылып отыр. Тек жүк вагонының динамикалық жүктемесі мен бір жүк операциясы кезінде вагонның кідіруіне қатысты тапсырма аздап кем орындалып, 99,8 және 99,4 пайыздар шамасын құраған.
Бүгінде бөлімше қызметкерлері осы жылдың бірінші жартыжылдығында пайдалану көрсеткіштерін табысты нәтижемен аяқтауға барлық қажетті шараны қабылдап, жұмыла жұмыс істеуге кіріскен. Пойыздардың қозғалыс қауіпсіздігін сақтау мен еңбек қорғау мәселесіне де ерекше көңіл бөлінген. Алда астық тасымалы маусымы күтіп тұр. Сондықтан жұмыс көрігі қызатын айлар алда дейді бөлімше мамандары.