Ақтөбедегі жол жөндеу жоспарға сай орындалуда

«ҚТЖ» ҰК» АҚ – «Ақтөбе магистральдық желі бөлімшесі» филиалының директоры Серғали Жайлаубай алғашқы тоқсан қорытындысын баяндап, атқарылып жатқан жұмыстар мен жоспарланған міндеттердің орындалу барысын айтып берді.

Ағымдағы жылы кешенді орындалған сауықтыру жұмыстарының нәтижесі бойынша жол сапасы 73 балл деп бағаланып отыр, өткен жылдан әлдеқайда жақсы көрсеткіш. 2019 жылға белгіленген жоспар бойынша 24,716 км жолға күрделі жөндеу жүргізу жоспарланған. Ақтөбе рельсарқалық зауытынан шыққан отандық өнімдерді пайдалану көзделіп отыр екен.

– Күрделі жөндеу жұмыстарын шілде айында Ақтөбе және Біршоғыр станцияларынан бастаймыз деп жоспарлап отырмыз. Ауыр жол жөндеу машиналарымен152,4 шақырым жолға жазғы жөндеу жұмыстары жасалды. 70,2 шақырым жолға ПРБ машиналарымен түзету жұмыстары, Атлас машинасымен 30 шақырымға рельстерді тегістеу жұмыстары жүргізілді. РМ машинасының көмегімен 10 шақырымдық жолда қиыршық тастардан тазарту жұмыстарын аяқтадық. Жүрдек пойыздар мен жолаушылар пойызы, контейнерлік пойыз маршруты жүретін негізгі магистральдарға баса назар аударылды, – дейді филиал басшысы Серғали Жайлаубай.

Атқарылған жұмыс технологиясының талапқа сай жүргізілуіне бақылау күшейтіліп, 9,3 шақырым жолға рельс ауыстыру жұмыстарының сапалы атқарылуы басты назарға алынған. «Үйдің сапасы ағашына байланысты» демекші, жолдың жағдайы сапасына байланысты екенін жолшылар жақсы түсінеді.

Жалпы, Ақтөбе магистральдық желі бөлімшенің бақылауында 2568,9 шақырымға созылған жол бар. Оның 2019,9 шақырымы – басты жолдар. Қалған 760,3 км станциялық және 25,7 км өзге де жолдар құрайды. 2497 бағыттамалы бұрма мен 1407 көпір және 109 өткел жол шаруашылығымен бақыланып отыр.

Қорыта айтқанда, магистральдық желі Орал, Илецк, Никельтау, Ақтөбе, Қандыағаш, Біршоғыр және Шалқар секілді жеті жол дистанциясына қарасты жол шаруашылығын қамтиды.