Қауіпсіздік талаптары толық орындалуда

Қызылорда өрт қауіпсіздігі қызметі жұмысын күшейте түскен. Өйткені аймақтағы аптап ыстық кез келген сәтте өрттің бұрқ ете қалу мүмкіндігін арттырып отыр. Сондықтан өрт сөндірушілер «екі шоқып, бір қарауда».

Қызылорда аймақтық өрт қауіпсіздігі қызметі теміржол нысандарында болуы мүмкін өрттің алдын алу жұмыстарын, ескерту, тексеру жұмыстарын жүргізеді. Ал бөлімше бойынша тораптық станция саналатын Шиелі, Қызылорда, Қазалы және Сексеуіл секілді бекеттердегі өрттің алдын алу жұмыстарын аталған станциялардағы Өртке қарсы қызметі өрт сөндіру пойызы теміржолшылары жүргізіп келеді.

Қызылорда өрт қауіпсіздігі қызметінде қазіргі таңда бар-жоғы үш қызметкер – инспекторлар Асылбек Досанов, Спандияр және қызмет басшысы Жетіскен Жұматовтар қызмет етуде. Аз құрам болса да болуы мүмкін тілсіз жаудың алдын алып жүрген жігіттердің еңбегі ерен. Олар өткен жылы 14892 нысанды тексеруден өткізіп, 890 дана кемшілік тапқан екен, биылғы алты айдың ішінде 1285 нысанмен жылжымалы құрамдардан 462 дана нұқсандық анықталып, хаттамалар толтырылып, мекеме басшыларына 65 ескерту хат жөнелтілген екен. Бұл жайында мекеменің инспекторы Асылбек Досанов мәлімдеді.

– Қызылорда өрт қауіпсіздігі қызметі аймақтағы учаскелік станциялардағы теміржол нысандарында темір жол жылжымалы құрамы, жол, құрылғыларды, ғимараттарды, механизмдер мен қосалқы заттардың жұмысқа дайын күйде ұсталып сақталуын қадағалап, бақылап, сондай-ақ төтенше және техногендік сипаттағы апаттардың салдарын жою (өрт, қауіпті жүктердің теміржол көлігімен тасымалдануы кезінде ағып кетуінің алдын алу, т.т. ), болуы мүмкін өрттің алдын алу жұмыстарын атқарып келеді. Өткен жылы 890 кемшілік табылса, ағымдағы жылдың алты айында біздерге белгіленген учаскелерден 462 кемшілік анықталып, өрт қауіпсіздігінің алдын алу шаралары жасалды, тиісті мекеме басшыларына ескерту жөнелтіліп кемшіліктің дер кезінде орнына келтірілуі бақылауға алынды, – дейді мекеме инспекторы Асылбек Досанов.

Теміржол нысандарында болып қалуы мүмкін өрт қауіпсіздігінің алдын алу, төтенше және техногендік сипаттағы апаттардың салдарын жою мақсатында жұмыс жасап келе жатқан Қызылорда өрт қауіпсіздігі қызметі «ҚТЖ» ҰК» АҚ Еңбек және экология қауіпсіздігі департаменті филиалы ретінде 2017 жылы құрылғаннан бері қарқынды жұмыс жасап келеді екен. Бұл екі жылда анықталған кемшіліктер көрсеткішінің күрт төмен түсуінен-ақ байқалса керек. Яғни, 2018 жылдың алты айында 1482 нысаннан 890 кемшілік анықталған болса, 2019 жылдың алты айында 1285 нысаннан 462 кемшілік анықталып, мекеме басшыларына 65 дана өрт шығу қаупі бар нысандарға кесім толтырылған. Мәселен, анықталған кемшіліктер стационарлық нысандардан – 39, электр желісінен – 15, жолаушылар вагондарынан – 3, теміржол өтпе бөлік жолағынан 7 мәрте кемшіліктің анықталғаны қызмет инспекторларының үздіксіз жұмыс жасауда екенін айғақтаса керек.

– Біздің ұжым инспекциялары өрт және техникалық ұйымдастырушылық іс-шаралар бағдарламасы шеңберінде объектілер мен жылжымалы құрамдардағы өрт қауіпсіздігінің деңгейін арттыруға бағытталған кешенді бағдарламаларды басшылыққа алып, халық қауіпсіздігінің нормативтік деңгейін қамтамасыз етуге және өрттің зиян келтіру қаупінің алдын алуға бағытталған кешенді шараларды жүргізеді. Және де инспекторлары стационарлық объект ұйымдарының қызметкерлерінің өрт-техникалық минимумы бойынша комиссиялық сабақтарының сапалы өткізілуіне қатысып, өрт қауіпсіздігінің алдын алу шараларының күшейтілуіне үлес қосып келеді, – дейді инспектор Асылбек Досанов.