Автотіркегіштен ақау тапты

Маңғыстау вагон пайдалану депосының техникалық қызмет көрсету қосынында еңбек ететін Нұркен Қалилаев – тәжірибелі теміржолшы. Маңғыстаулық вагон қараушы жақында Өзбекстаннан Ақтау портына бет алған жүк пойызының вагонынан ақау тауып, апатты жағдайдың алдын алды.

7 шілде күні күндізгі ауысымда түс мезгілінде Маңғыстау станциясына келіп тоқтаған №2102 жүк пойызын тексеру барысында вагон қараушы Нұркен Қалилаев бір вагонның автотізбегінен үлкен көлемде сызат анықтады. Техникалық қызмет көрсету кезінде табылған ақауды тексере келе оның қауіптілігі анықталады. Сызат тереңдеп, автотізбек сынып кеткен жағдайда жүк тиелген вагондар екі жаққа бөлініп кетіп, үлкен апаттар болуы мүмкін еді. Ал ол сызаттың ертелі-кеш сынатыны да талас тудырмайды.

Алғаш Маңғыстау вагон пайдалану депосының техникалық қызмет көрсету қосынына аккумулятор қуаттаушы болып кірген Нұркеннің саладағы еңбек өтілі 13 жылды құрайды. Ал вагон қараушы болып еңбек етіп жатқанына он жыл. Осы жылдар ішінде ол талай рет ақау тауып, яғни талай рет апатты жағдайдың алдын алды деуге болады. Атап айтқанда, бұған дейін ол бірнеше рет бүйір рамасынан, вагондар шанағынан ақау тапқан. Бұл жолғы анықтаған ақауы бойынша да оның еңбегін арнайы комиссия бағаламақ. Әзірге аталған вагон пойыздан ағытылып, жөндеуге жіберілді.

– Теміржолға әбден төселіп алдым. Жұмысым өзіме ұнайды. Жылына бір рет Ақтөбеге білім жетілдіру курсына жіберіп тұрады. Қазір теміржол саласында сырттай жоғары білім алудамын, – дейді қырағыкөз вагоншы жігіт. Басшыларының айтуынша, жұмысына адал, жауапкершілігі зор Нұркен сияқты теміржолшылардың арқасында пойыздардың қауіпсіздігі қамтамасыз етілуде.

Еңбекқор жігіт үлкен отбасын осы жұмысымен асырап отыр. Нұркен қызмет ететін қосында бүгінгі таңда 120 адам еңбек етсе, соның жүзге жуығы вагон қараушылар, қалғандары слесарьлар, аға вагон қараушы, шебер, нұсқаушы, сығымдағыш машина жүргізушісі, УЗОТ операторы және тағы басқа мамандық иелері. Қосын бастығы Ерболат Сәулебаевтың айтуынша, Нұркен сияқты тәжірибелі жұмысшылардың арқасында жыл басынан бері қосын вагон қараушылары 10-нан астам ақау анықтаған. Өткен жылғы ақаулар бойынша 5 адам «Қозғалыс қауіпсіздігі үшін» белгісімен марапатталған. Ал биылғы ақау тапқандар есімі компания басшылығына енді жіберіліп, алдағы марапаттарға ұсынылды. Қосын жұмысшыларының дені жастардан құралған, мұнда ең жас вагон қараушы 26 жаста болса, ең үлкендері елуді еңсергендер екен.