Қызылордада ағымдық күтім жоспарға сай

Қызылорда жол дистанциясы ұжымы биылғы маусым айында және өткен алты айдың ішінде пойыздар қозғалысы қауіпсіздігін қамтамасыз ету шараларын өз телімдерінде талап деңгейінде ұйымдастыра білген. Аталған уақыт аралығында пойыз апатына және басқа оқыс оқиғаларға орын бермей, қауіпсіздікті қатаң сақтаған.

Дистанцияның жыл басынан бергі аралықтағы жұмыстары жайлы Қызылорда жол дистанциясы техникалық бөлімінің басшысы Кенже Қойшыбаева ұсынған мәліметке сенсек, жолшылар қауымы маусым айында және жыл басынан бергі алты ай ішінде жылжымалы құрамдардың қозғалыс қауіпсіздігін сақтап, қауіпсіздіктің бұзылуына жол бермеген. Пойыздардың телімдерде кестеден тыс кідіруі орын алмаған. Дегенмен түрлі себептердің салдарынан дистанция бойынша пойыз машинистерінің өткен жылдың маусым айында 11 рет, биылғы маусымда 4 мәрте жедел тежегіш қолдануы тіркелген.

– Қызылордалық жолшылар жыл басынан бері пойыздардың қауіпсіз қозғалысын сақтау шараларын қатаң сақтап келеді. Жолды күрделі жөндеу жұмысы межеленбегенмен, техникалық талапқа сай бабына келтіріп, ағымдық күтіп ұстау жұмыстары тұрақты жүргізілуде. Өндірістік жұмыс барысында пойыздың құлауы, апатты жағдайлар мен оқыс оқиғаларға орын берілмей қауіпсіздікті сақтау шаралары қатаң сақталуда. Алайда, локомотив машинистерінің жедел тежегіш қолдануы азаяр емес. Осы бағытта ауқымды жұмыстар жасалуда, – деді дистанцияның техникалық бөлімінің басшысы Кенже Қойшыбаева.

Дистанция телімдерінде локомотив машинистерінің жедел тежегіш қолдануы биылғы алты айда 41 рет, өткен жылдың сәйкес мерзімінде 48 мәрте тіркелген. Биылғы жылы орын алған жағдайларды саралап айтсақ, онда 21 рет иесіз малдың, 20 мәрте бөгде адамның жолға белгіленбеген жерден шығып, оның екі жағдайында адам басу оқиғасы тіркелген екен. Иесіз малдың жолға шығып кетпеуі үшін жолшылар биыл маусымда 1,5 км сым қоршау жөндеген, ал алты айда жоспарланған 12 км орнына 15 км жаңа бағаналар тұрғызып, сым тартып, ескі қоршаулар жөндеуден өткізілген.

Телім жолдарының техникалық талаптарға сай болуы үшін дистанция балансындағы 24 ақаутапқыш арбашамен жоспарға сәйкес маусымда 1709 км негізгі жол, 119 км қабылдау-жөнелту жолдары, 1134 жинақ жол бұрмасы, 2880 дәнекерленген түйіспе тексеруден өтіп, ақаутапқыш арбалардың пайдалану тиімділігі 100 пайызды құраған екен. Алты айда анықталған екі ақаулы рельс ауыстырылған. АЛСН құрылғысының қалыпты жұмысы тұрақты сақталуда. Жол күтімінің 54 бірлікке белгіленген көрсеткіші маусым айында 62 бірлікке орындалған.

Жолдарды ағымдық күтіп-баптау шаралары барысында жол машиналары қолданылған. Мәселен, маусым айында РМ машинасымен 11955 метр жол, Дуомат, ДГС машиналарымен 26 км, ПБР-мен 42 км, ЩОМ7-мен 21,66 км жол бойында жұмыс жасалып, ағымдық күтім шаралары жоспарлы орындалған екен.

Жылжымалық құрамдардың қауіпсіз қозғалысын сақтау мақсатында басшылық құрамның жолды жағалап тексеруі жүргізілуде. Темір жол маңында мал бағу, жолдан белгіленген жерден өту ережесіне түсіндіріп, алдын алу жұмыстарын арттыру, әр аптаның жұма күндері сым қоршауларды жөндеуді қамтамасыз ету және жолшылар үшін уақытылы рельс тізбектеріндегі рельс жалғағыштарының түгелдігін ШЧ мамандарымен бірге тексеруден өткізу, айдан айға 2-дәрежелі ақаулардың жойып азайтуға күш салу, материалдық құндылықтарды үнемді пайдалану сынды жұмыстарға басымдық берілуде екен. Әрине, мұның барлығы жолшылардың күнделікті жүргізетін кәсіби жұмысына айналған.

Сонымен қатар теміржол маңына мал жаю ережесімен маусым айында 712 тұрғынға, алты айда 122 мәрте жиналыс өткізіліп, 7256 адамға қауіпсіздік ережелерінен үзінділер таратылып, таныстыру жұмыстары жүргізілген.

Және де биылғы алты айда қызылордалық жолшылар ЖІІб қызметкерлерімен бірге 61 рет рейд өткізген. 54 рет мектептерде болып, 6932 оқушымен түсіндіру-таныстыру жұмыстарын жүргізіп, 113 рет жиын өткізсе, теміржолдан тек белгіленген жерлерден өту ережелерімен 4688 адам таныстырылған. Алайда, жұмыстар тұрақты жүргізілгенмен иесіз малдың теміржолды бойлай жайылып, жолға шығып кетуі тыйылмай тұрғаны байқалады. Дистанция бойынша 17 теміржол өтпесі болса, оның барлығы арнайы күзетіледі екен. Арнайы мамандар тарапынан өтпе кезекшілерімен бірге рейд жасалып, автокөлік иелеріне өтпелерден өту ережелері түсіндірілген. Мәселен, ағымдағы жылдың маусымында 87 мәрте рейд өткізіліп, 712 автожүргізуші, алты айда 240 рейд ұйымдастырылып, 3492 жүргізуші ережемен таныстырылып, жергілікті атқарушы орган мен ЖІІ бөліміне 41 рет хат жөнелтілген.

– Пойыздардың қозғалыс қауіпсіздігін сақтау мақсатында тұрғындарға хабарлама ретінде мыналарды айтқым келеді. Теміржол – қауіпті де маңызды аймақ. Ол жерде бей-берекет жүруге, жол бойын жағалай мал бағуға болмайды, аймақта балаларды қараусыз қалдырмау керек. Егін жұмыстары кезінде және ауа температурасының жоғары жағдайында өрт қауіпсіздігі ережелерін, санитарлы-экологиялық норма талаптарын қатаң сақтау керек екендігін тағы бір мәрте қайталап айтқанымыз артық емес деп ойлаймын, – дейді Қызылорда жол дистанциясының техникалық бөлімінің басшысы Кенже Қойшыбаева.