Қызылсайда тағы бір адам ажал құшты
Пойыздың адам басу фактілері азаяр емес. 21 шілде күні Шымкент іргесіндегі ел аузында қанды өткел атанған Қызылсайда тағы бір адам ажал құшты.
Манкент-Қызылсай өткелінде ер адамның келе жатқан пойыздың астына өзін-өзі тастап, суицид жасағаны мәлім болды. Шымкент жол дистанциясының диспетчеріне локомотив бригадасы құрамының машинисі Садыбековтің шұғыл тежеу қолданғаны туралы хабарлама келіп түседі.
Манкент-Қызылсай өткеліндегі 9 пикеттегі 3306 км қашықтықта 65 км/с жылдамдықпен кетіп бара жатқан №2889 жүк пойызының №1954 электровозы сағат таңғы 4:45 минутта жолда адам тұрғанын көріп оқыс тежеу жасағанымен, ер адамды басып өтіп тоқтайды. Машинист радиобайланыспен пойыз жолына адам шығып Қызылсай станциясына тоқтағаны туралы хабар береді. Оқиға орнына келіп жеткен Шымкент жол дистанциясының бас инженері Н.Жарылқапов, Қызылсай станциясының 5-ші телім жол шебері А.Көлбаев, Шымкент станциясы ЖІІБ тергеушісі, полиция капитаны Е.Садықов барады. Тиісті қызмет өкілдері адам өлімін растап, мәйіт Шымкент қаласындағы МОРГ-ке жеткізіледі. Ол 1976 жылы туылған Хасан Юлдашев деген Өзбекстанның азаматы әрі жалдамалы жұмысшы екені анықталады. Белгілі болғандай, 3306 км жол учаскесінде теміржолдың бойына мал-жан шығып кетпес үшін қоршалған және қауіпті аймақ екендігі туралы ескертулер де таңба тайға басқандай тұр. Аталған оқиғада қаза болған азаматтың ажалына осы ескертулерді өрескел бұзып, қауіпсіздік талаптарын сақтамағаны себеп болған. Жанынан безгендердің суицид орнын теміржол төңірегінен таңдайтыны, өкінішке орай, жиілеп барады...