Вагон қараушы қауіпті ақау тапты
«Қазақстан теміржолшысы» газетінің тілшісі
Бейнеу станциясында қозғалыс қауіпсіздігіне байланысты өткізіліп жатқан айлық барысында жүк пойызын тексеріп жүрген вагон қараушы Сабыржан Көбейсінов күрделі ақау тапты.
Бұл жолы бейнеулік вагон қараушы жез сепараторының сынығын анықтады. Өзбекстан темір жолы меншігіне жататын жүк вагоны бос болған. Ақаулық дөңгелек жұптарының оң жағындағы 2-3 арбашасынан табылды. Нәтижесінде вагон әрі қарайғы пайдаланудан шеттетіліп, жөндеуге ағытылып алынды. Ақауды анықтауда қырағылық танытқан вагон қараушы Сабыржан Көбейсінов теміржолда 2005 жылдан бері еңбек етіп келеді, өте тәжірибелі.
Маңғыстау вагон пайдалану депосының директоры Сәрсенбай Есенқұловтың айтуынша, ақау тапқан вагон қараушы 2017 жылы да жүк вагонынан өте қауіпті ақау тауып, өз ісінің білгірі екенін танытқан екен. Ол кезде салқын күйде тұрған шанақтың 15 мм жылжып кеткендігін байқаған болатын. Сол кезде ол көрсеткен кәсіби қызметіне сай «Қозғалыс қауіпсіздігі үшін» төсбелгісіне ие болған. Төл мереке қарсаңында қауіпті ақауды анықтау арқылы апаттың алдын алған қызметкерлерін депо ұжымы мақтан тұтатынын да жасырмады.
Бейнеу техникалық қызмет көрсету қосынының бастығы Нұралы Қылышовтың айтуынша, аталған ақауды станция-да бақылау қосындарында тұрған КТСМ-02 қондырғысы анықтамаған.
– Бұл қондырғы темір жол бойында орнатылған, ол жүріп келе жатқанда букстың қызуы арқылы ақауды анықтайды. Бірақ әлгі ақаулы пойыз сол жерден өткенде букс қызбаған. Техниканың аты техника ғой. Өзбекстаннан келе жатқан жүк пойызы станцияға 29 шілдеде сағат 17.10 келіп тоқтағасын вагон қараушылар техникалық тексеруге кіріскен. Олар қолдарындағы бақылау балғаларымен буксты ұрып қарайды. Сонда 2 дыбыс шықса, бір нәрсе дұрыс емес деген сөз. Сөйтіп Сабыржан екі дыбыс шыққасын буксты ашып қараса, ішінде сепаратор сынған екен. Сепаратор деген мойынтіректі ұстап тұрады, ол сынғасын мойынтіректер бір жерге жиналып қалады да, содан дөңгелек айналған сайын букс мойыны желіне береді, ол сынса, вагон жолдан шығады, – дейді қосын бастығы.
Жалпы бұл қосында барлығы 178 адам еңбек етеді. Биыл жыл басталғалы қосынның вагон қараушылары осымен 15 ақау тауып тұрса, соның ішінде дәл осы сепаратор бойынша 9-шы ақау анықталып отыр екен. Нұралы Қылышовтың айтуынша, атақ пен абыройға қажырлы еңбектерімен жететін бейнеулік вагон қараушылардың арасынан биылғы төл мерекеде 3 адам «Қозғалыс қауіпсіздігі үшін» төсбелгісімен, 1 адам компания атынан Алғыс хатпен, тағы 1 адам «Кәсібі бойынша үздік» белгісімен марапатталмақ.