Өнімді еңбек шарты
«Қазақстан теміржолшысы» газетінің тілшісі
Әр күн, апта, ай, тоқсан, жыл есебін шығарып отыру – темір жол саласында өнімді еңбек етуге әкелетін басты шарт. Сондықтан темір жол саласында басшылар тексерулер алдындағы есеп беру жиындарын жиі өткізіп отырады. Кезекті жиын Маңғыстау ЖТ жол бөлімшесінде өткізілді.
Филиал директоры Нәжімеден Ғұбашевтің басқаруымен өткен селекторлық жиын түбекте жыл басынан бергі 7 айдағы пойыздар қозғалысының қауіпсіздігіне арналды. Оған станциялар мен вагон және локомотив деполарының басшылары қатысты.
Аталған кезеңде қозғалыс қауіпсіздігін қамтамасыз ету бойынша негізгі назар, әрине жұмысшылардың өз қызметтік міндеттемелерін сапалы орындауына аударылды. Бұл әсіресе, пойыздарды өткізу мен жөнелту технологиясын сақтау, маневрлік жұмыстарды жүргізу, станция ТТА-не сәйкес нормалар мен ережелер бойынша жылжымалы құрамды бекіту, пойыздық және маневрлік қозғалыстар кезіндегі қызметтік келіссөздер тәртібі, еңбек режимі мен локомотив бригадаларының демалысын сақтау, таспаны оқу, депоның командалық-инструкторлық құрамының жұмысы, пойыздар мен вагондар құрамына техникалық қызмет көрсету талаптарын сақтау туралы болды.
Филиал директоры «Қозғалыс қауіпсіздігіне ерекше назар» атты айлық кезінде персоналды оқыту бойынша тапсырманың орындалуына ерекше мән берді. Сондай-ақ, стандартты емес жағдайлар кезіндегі іс-әрекеттерге, станциялар бастықтарының өз жоспарын сапалы орындауы, қозғалыс қауіпсіздігі бойынша вагон және локомотив деполары басшыларының нормативтерді мүлтіксіз атқаруы, сапалы жөндеу жүргізу, жылжымалы құрам мен техникалық құралдарды пайдалану мен қызмет көрсету, еңбек қорғау, өрт қауіпсіздігі жағдайлары сөз болды. Аталған селекторда желілік кәсіпорындар басшыларына жоғары талаптар қойылды, тапсырмалар орындалмаған жағдайда ең қатал деген шаралар қолданылатыны ескертілді.