Шетпе станциясы: регламентке сай

Жақында жұмыс бабымен айлық тексеруге шыққан Маңғыстау ЖТ бөлімшесі директорының орынбасары Ерлан Бүркітов Шетпе станциясына локомотивпен жетіп, жолай бірнеше бекеттердің де жұмысына шолу жүргізді.

Машинистермен бірге таңертең ерте шығып, жолда Тамақ, 14, 15, 16 бекеттерге де аялдаған орынбасардың айтуынша, әріптестері өз жұмыстарын арнайы регламентке сай толығымен дұрыс атқарып отыр. Сонымен қатар локомотив кабинасында машинист пен станция кезекшісі арасындағы өзара байланыс регламенті де талапқа сай. Бұл орайда олар «Пойыздық жұмыстар кезінде локомотив бригадаларының сөйлесу регламенті» құжатын негізге алады.

Түске таяу Шетпе станциясына барған Ерлан Бүркітов инфрақұрылымдық нысандардың, жолдардың, бұрмалардың жағдайына назар аударды. Аға электр механиктер, телім бастықтары орынбасарларының жұмыс жасаудағы біліктілік деңгейі тексерілді. Сонымен қатар техникалық қызмет көрсетуге қатысы бар адамдардың біліміне назар аударылған.

– Комиссиялық айлық тексеру норматив бойынша тоқсан сайын бір рет өткізілу керек. Өткен айда Бейнеу станциясында өткізілсе, кесте бойынша тамыз айында бұл жолғы кезек Шетпеге келді. Станция бастығы, вагон депосы, локомотив депосының қызметкерлері, т.б. басын қосқан үлкен жиын өткіздік, кемшіліктерді атап өтіп, олардың шешу жолдарын қарастырдық. Маневрлік жұмыстар кезіндегі апаттар, жолдан шығулар бойынша фильм көрсеттік, білмегенін үйреттік, бүгінгі таңда бөлек-бөлек жүргізіліп жатқан үш айлық туралы мәлімдедік, осының бәрі оларға бір жағы техникалық сабақ болды, – дейді Ерлан Бүркітов.

Еске сала кетсек, бұл бөлімше бойынша жарияланған. 20 шілде мен 20 тамыз аралығында өткізіліп жатқан «Қозғалыс қауіпсіздігіне ерекше көңіл» атты айлық. Екіншісі – 5 тамыз – 5 қыркүйек аралығында ұйымдастырылған «Локомотив бригадалары мен станция кезекшісі арасындағы сөйлесулердің регламентін сақтау» деп аталатын айлық. Үшіншісі – дәл осы аралықта жарияланған «Есте сақта, тежегіш табандық – қатаң есепке алынатын инвентарь» деген айлық.

Техникалық сабақтан соң бөлімше өкілі Шетпе станциясындағы кезекшілер, пойыз құрастырушылар және сол күнгі локомотив бригадалары жұмысына аяқасты тексеру жүргізген. Маневрлік жұмыстар кезінде шетпеліктер өз қызметтік міндеттерін сауатты орындаған. ШЧ мекемесінің ЛАЗ бөлімінде станция кезекшісі мен машинистер және пойыз құрастырушылар арасындағы сөйлесулер жазылып қалатын «Гранит» құрылғысы тыңдалған, бұл құрылғыдағы жазба 2-3 айға дейін сақталады. Сол құрылғы жазбалары тыңдалып, станция қызметкерлерінің жұмыстарына да баға берілді. Кемшіліктері ескерілді. Осындай кешенді тексеру жұмыстарынан соң Ерлан Бүркітов шетпеліктердің жұмысы барлық регламенттерге сай жүзеге асырылып жатыр деп баға берді.