Қарауылкелді станциясында оқу-жаттығу шарасы өтті
Ақтөбе облысы бойынша меншікті тілші
Ақтөбедегі Қарауылкелді станциясында азаматтық қорғаныс бойынша кешенді оқу-жаттығу шарасы өтті. Теміржолшылар төтенше жағдай кезіндегі шұғыл жұмыс жасау тәртібін іс жүзінде көрсетуге тырысты.
20-24 тамыз аралығында Қарауылкелді станциясының аумағындағы өткен оқу-жаттығу жұмыстарына тұйық жолда «төтенше жағдай» себеп болды. Жаттығу кезінде теміржол аумағына ірі көлемде хлор төгіліп, жедел залалсыздандыру жұмыстары жүргізілді.
Арнайы сценарий бойынша теміржол бойындағы апатты жою жұмыстары ұйымдастырылған. Алдымен барлау, эвакуациялау, медициналық көмек көрсету жұмыстары жүрді. Кейін хлордың төгілуі тоқтатылды. Рельс бойын залалсыздандыру, қалпына келтіру жұмыстары жүргізілді. Оқиға орнына төтенше жағдайлар қызметі, денсаулық сақтау департаментінің мамандары, апаттар медицинасы орталығының жедел әрекет ету бригадасы келді. Оқу-жаттығу кезінде арнайы құрылымдар өздеріне жүктелген тапсырманы толық орындап шықты.
«Оқу-жаттығудың бірінші минутынан бастап тұрғындар арасында үрейленудің алдын алу мақсатында аудандық ақпарат қызметі бұқаралық ақпарат құралдары, телерадиоарналар, Whatsapp, Instagram, VK әлеуметтік желілер арқылы тұрғындарды хабардар етуді ұйымдастырды. Мешіттердің, мәдениет үйлерінің шатырынан, стационарлық және ұтқыр дауыс зорайтқыш құрылғылардан тұратын арнайы автокөліктер пайдаланылды.Осындай бірлескен жаттығу аясында төтенше жағдайда шұғыл жұмыс жасау меңгерілді. Сонымен бірге жаттығу аясында вагондарға жүктерді тез тиеп, түсіру жұмыстары да жасалды. Барлық тапсырма белгіленген шекті уақыт шеңберінде тиянақты орындалып, шұғыл жағдайға әрекет ету жұмыстарына жоғары баға берілді», – дейді Қарауылкелді станциясының басшысы Жанболат Алпысбаев.
Оқу-жаттығу жұмыстары тұйық жолда өрт сөндіру пойызының қатысуымен өтті.