Маңғыстауда жүк тиеуді жетілдірмек
Маңғыстау жүк тасымалы бөлімшесінде сегіз айдың қорытындысы бойынша жүк айналымы – 104 пайызға, статистикалық жүктеме – 103 пайызға, локомотивтің орташа тәуліктік жүрісі – 102.7 пайызға, техникалық жылдамдық – 100.7 пайызға, локомотив өнімділігі 100.8 пайызға орындалды.
Жүк тиеу көрсеткіші жүз пайызға жете алмай қалған, яғни 99.4 пайызды құраған. Сол себепті Маңғыстау филиалы жүк тиеу мен жөнелту бағытында жұмысты ширатып отыр. Жуырда Бейнеу локомотив айналым депосында сегіз айдың қорытындысы бойынша өткен кезекті тораптық жиында осы мәселе жан-жақты қаралып, кейбіртұстар талқыға салынды. Жиын Маңғыстау жүк тасымалы бөлімшесі директорының орынбасары Ерлан Бүркітов, Қозғалыс қауіпсіздігі департаментінің Маңғыстау телімі бойынша бас инженері Болат Дүйсәлиевтің қатысуымен өтті. Ерлан Бүркітов көрсеткіштерді арттырып, қызметті сапалы орындауға қажетті алғышарттарды атап, оны ұйымдастыру жолдары жөнінде айтса, Болат Дүйсәлиев қауіпсіздікті қамтамасыз етуге қажетті шараларды шегеледі.
Жалпы жиналыста біраз мәселе қамтылды. Маңғыстау жүк тасымалы филиалында жүзеге асырылып жатқан жоспарлар сөз болды. Мекеме басшыларының жұмысы сұралып, ұсыныс-пікірлер тыңдалды. Сондайақ, Рамиль Құттымұратов, Сәрсенбай Есенқұлов, Әлібай Жауынбаев, Сәндібай Күзенбаев, Оралбай Абдашов өздеріне тиесілі жұмыстарға қатысты есеп берді.
− Қазір біз жүк тиеуді арттыру бойынша арнайы іс-шаралар жоспарын түзіп, сол бойынша жұмыс жасаудамыз. Басты бағыт – филиалдың жедел қызметі мен эксплуатациялық жұмыстарды жақсарту және оның ішінде вагон мен локомотивті дұрыс пайдалану, жанар-жағармай үнемдеу, жүк тиеу мен түсіру сынды жұмыстар көрсеткішін жақсарту болмақ. Екіншісі – жаңа техника мен техналогияны пайдалана отырып жұмысты жетілдіру. Барлық мүмкіндікті тиімді пайдалану және эксплуатациялық шығындарын азайту. Үшіншісі – пойыздардың ағымдағы қауіпсіз қозғалыс жағдайын жақсарту. Төртіншісі – жұмыс күшінің әлеуметтік тұрақтылығы. Міне, бүгінгі күні компаниядағы негізгі бағыттар осы, – деді бөлімше директорының орынбасары.
Сонымен қатар тораптық жиында жүк жүктеу бойынша клиенттермен жүзеге асырылатын, астық терминалдарымен, жаңа жүйелермен жұмыстар сараланып, қозғалыс қауіпсіздігін қамтамасыз ету, онда жіберілетін кемшіліктер мен басты назарды қайда бағыттау керектігі туралы сөз қозғалды. АСУ ДКР, АСУ, логистика бөлімі, мониторинг, ақпараттық қолдау, көлемді жүктерді өткізу, өткен айлықтар нәтижесі, күзгі комиссиялық бақылау, толаскездер, жолдағы күрделі жөндеу, контейнерлік пойыздардың жылдамдығын арттыру, 18 қыркүйекке жоспарланған контейнер санағы – бәрі-бәрі сарапқа салынды.