Жаңа маусымға – жаңа вагондармен
«Қазақстан теміржолшысы» газетінің тілшісі
Еліміздегі жүк вагондары паркінің ірі операторы болып табылатын «Қазтеміртранс» АҚ әлеуметтік маңызы бар жүктерді тасымалдауда шешуші рөл атқарады. Компания жыл сайын вагон паркін жаңартып, жүк тасымалын қажетті жылжымалы құраммен жеткілікті деңгейде қамтамасыз етіп отыр.
Қазіргі уақытта «Қазтеміртранс» АҚ паркіндегі вагондар саны 39 000 бірліктен асады. Оның ішінде 29 067 ашық вагондар, 6 274 жабық вагондар. Жүк тиеу маусымы қызған шақта, жүктеменің де арта түсетіні белгілі, десек те компания мамандарының логистиканы икемді, ал жалға беру механизмдерін тиімді үйлестіре білуі нәтижесінде тұтынушылардың қажеттіліктері толық қанағаттандырылуда.
Компания әлеуметтік жүктерді тасымалдау кезінде вагондар айналымын шапшаңдатуды басым бағыттардың бірі ретінде қарастырады. Осыған орай жүк тиеу-түсіру жұмыстарын жүргізу уақытын қысқарту, логистикалық маршруттарды оңтайландыру және нақты уақыт режимінде жылжымалы құрамды пайдалану тиімділігін бақылау үшін мердігерлермен тұрақты түрде жұмыс жүргізіп келеді.
Жылжымалы құрам паркін жаңарту компанияның даму бағдарламасына сәйкес, кесте бойынша жүріп келеді. Мәселен, 2023-2025 жылдарға арналған сатып алу-сату шартында 3000 жарты ашық вагон сатып алу қарастырылған. Бүгінгі таңда осы вагондардың 2 960 бірлігі жеткізілді. Бұл паркті кезең-кезеңімен жаңартуға және пайдалану шығындарын азайтуға мүмкіндік беріп отыр. Қалған вагондарды жеткізу бекітілген кесте бойынша жалғасуда.
Компания 2024-2025 жылдардағы астық және жылыту маусымын жақсы қорытындылады. Өзінің жеке және жалға алған паркіндегі 12 000 жуық ашық вагонды жұмылдыра отырып, сөз болып отырған маусым ішінде 23,3 млн тонна көмір, 3,2 млн тонна астық тасымалдаған. Ал жалға алынған жылжымалы құрамды пайдалана отырып тасымалданған көмір көлемін есепке алғанда жалпы көрсеткіш 45,5 млн тоннаға жетіп жығылған.
Көмір тасымалы жүзеге асырылған негізгі бағыттар – Екібастұз, Шұбаркөл, Қызылжар, Нұра және Дегелең станциялары. Астықтың көп көлемі Көкшетау және Қостанай филиалдарынан тиеліп, басым бөлігі Қытай мен Орталық Азия елдеріне жөнелтілген. Жүктерді тасымалдау процесінің бұзылғаны туралы деректер тіркелмеген. Дегенмен, компания үнемі маусымдық жүктемелерге тап болатыны жасырын емес. Алайда, компанияның барлық филиалдары жұмыла жұмыс істеуінің және клиенттермен жедел әрекет етуінің арқасында алға қойылған міндеттер тиімді іске асырылуда деуге болады.
Алдағы астық және жылыту маусымын жүк вагондары паркінің операторы қалай қарсы алады деген сауалымызға «ҚТТ» АҚ-ның Даму жөніндегі басқарушы директоры Еділ Искаков:
– Қазтеміртранс жаңа маусымға жаңартылған және жабдықталған парк ұсынады. Басты назар заманауи ашық вагондарға, соның ішінде жаңа жеткізілімдерге аударылып отыр. Сонымен қатар қажетті резерв қалыптастырылған, қажет болған жағдайда қосымша жылжымалы құрамды тарту үшін жалға алушылармен өзара әрекеттесудеміз. Біз көмірді де, астықты да тұрақты және уақытылы тасымалдауды қамтамасыз етуге дайынбыз, – деп жауап берді.