Оң нәтіже көрсетті
Қыс мезгіліне дайындықты шыңдап, жұмысты ширата түскен күзгі байқау мәресіне жетті. Маңғыстаудағы күзгі бақылаудың қорытындысы былтырғыға қарағанда айтарлықтай оң нәтижемен аяқталды.
Биыл анықталған кемшіліктер саны өткен жылғыдан кеміген. Өткен жылы күзгі тексеріс кезінде 1037 кемшілік табылған болса, осы жылы 1027 олқылық кездескен. Тыйым салынған шаралар 68ден 55-ке төмендеген. Өткен жылмен салыстырғанда кемшіліктер ШЧ Құлсарыда, ШЧ Маңғыстауда, ПЧ Құлсарыда, ПЧ Маңғыстауда айтарлықтай азайған. Кері көрсеткіштер азайды десек те, жойылып кетпеген. Әлі де бар. Сондықтан оны алдағы уақыттарда қайталамау үшін не істеу керек, күзгі тексерісті қорытындылаған жиын соны жан-жақты сарапқа салды. Маңғыстау жүк тасымалы бөлімшесінде бөлімше директоры Н.Ғұбашов төрағалық еткен жиында Маңғыстау магистральдық желі бөлімшесі директоры М.Бақтыгереев, Қозғалыс қауіпсіздігі департаментінің Маңғыстаудағы бас ревизоры Б.Дүйсәлиев, жүк тасымалы бөлімшесі директорының орынбасары Е.Бүркітов, АСУ бойынша орынбасары Е.Мергенбаев, филиалдың бас инженері Қ.Жақанов, өндірістік техникалық бөлімі басшысы Е.Айдарханов, жедел басқару бөлімі басшысы А.Нұрсапин, қауіпсіздік қызметі басшысы А.Құсайынов, тарту және жылжымалы құрамды ұйымдастыру бөлімі басшысы Б.Төлепов, персоналмен жұмыс бөлімі басшысы Е.Қожахметов қатысып, өз салаларына қатысты есеп берді. − Маңғыстау жүк тасымалы бөлімшесі көлемінде қыркүйек пен 9 қазан аралығында өткен күзгі тексеріс өз деңгейінде жүргізілді. Онда кездескен кемшіліктер бойынша әр мекеме басшылары жауап беріп, табылған олқылықтарды жою жөнінде нақты тапсырмалар жүктеледі. Қорытынды жиналыста орын алған кемшіліктер қайталанбауы үшін қажет жұмыстар тізімі жасақталды, бірқатар мамандарға ескертпелер берілді, – дейді Маңғыстау жүк тасымалы бөлімшесі директорының орынбасары Е.Бүркітов. Маңғыстау өңіріндегі күзгі тексеріс Бейнеу-Тассай телімінде орналасқан Алтай бекетінен басталған еді. Сол күні аталған учаскенің 11 пункті қамтылса, ертесіне өзбек теміржолымен шектесетін БейнеуҚарақалпақия аралығында жалғасты.