Орташа жалақы - 188 мың теңге

Шымкент жүк тасымалы бөлімшесі атқаратын жұмыс көлемінің ауқымына қарай жүк тиеуші бөлімше болып есептеледі. Бөлімшенің құрамына Арыс, Түркістан, Сарыағаш, Қазығұрт сынды ірі станциялар кіреді. Аймақта бірнеше локомотив және вагон деполары бар.

Бөлімшеге қарасты қолданыстағы темір жолдың жалпы ұзындығы 479 км құрайды. Оның ішінде 308 км – электровоз, 171 км тепловоз тартымымен жұмыс істейді. 450 км – автоблокировка, 11 км – жартылай автоблокировка, ал 19 км – электрліжезл жүйесімен жабдықталған.

Мұнда пойыз қозғалысын оперативті басқаруды 4 диспетчерлік айналым арқылы жүзеге асырады, бөлімшеге қарасты 39 станция бар. 6 негізгі станцияда жүктерді тиеп-түсіру жоспарының 80 пайызы қамтамасыз етіледі. Олар – Шымкент, Қазығұрт, Текесу, Сарыағаш, Түркістан, Қызылсай станциялары.

Штат кестесі бойынша бөлімшеде 3, 5 мыңнан астам адам еңбек етеді. Еңбекақы қоры – 5 млрд 792 млн теңге. Өткен жылмен салыстырғанда 548 млн теңгеге өсті. Орташа жалақы бүгінгі таңда 188 мың теңгені құрап, өткен жылмен салыстырғанда 16 мың теңгеге көбейген.