Біз алмайтын қамал жоқ
Абай облысы бойынша меншікті тілші
Семейлік жас буын теміржолшылар биылғы Жастар жылындағы атқарылған шараларды қорытындылап, алдағы уақытқа жаңа межелерді жоспарлауда. «ҚТЖ» ҰК» АҚ басқарма төрағасы жанындағы жастар ісі жөніндегі кеңестің Семей ЖТ бөлімшесі бойынша аймақтық өкілі Ілияс Несіпқамит қоғамдық жұмыстарда белсенділігімен танылған жаңа буын өкілдерін жинап өзара келелі кеңес өткізді.
Ұйым жетекшісі Ілиястың айтуынша, Жастар жылында атқарылған жұмыстар шаш етектен. Мәселен, жазда өткен Х корпоративті жастар лагерінің мерейтойлы сессиясында күллі ұлттық компания жастары арасында семейлік команда көш басынан табылып, бірқатар аталымдар бойынша бас жүлдені еншіледі. Мұның сыртында «Жайдарман» ойындарында да топ жарып, алдыңғы орындарды еншілеп жүр. Сол тәрізді спорттық салада да бөлімше туын желбіретіп, түрлі бәсекелерде қатарының алды атанған жас теміржолшылар бар. Мұның сыртында жастардың қайырымдылық марафоны аясында жыл бойы түрлі акциялар ұйымдастырылды. Ал мереке күндері өнерпаз жастар қызықты ойындар өткізіп, көпшілік алдында ән мен жырдан өз өнерлерін ортаға салды. Ілияс Несіпқамит айтып өткендей, жылжабар шаралар әлі де бар. Атап айтсақ, 16 желтоқсан – Тәуелсіздік күніне орай өңір теміржолшыларына арналып, жастардың әзірлеуімен үлкен мерекелік кеш өткізілмек. Қазіргі күні өнерпаз жастар қауымы оған даярлық жұмыстарын жүргізіп жатыр. Желтоқсан оқиғасына байланысты арнайы қойылым сахналанып, Жастар жылындағы шаралар қорытындыланбақ. Осылайша желі бойындағы барлық мекемелер мен еншілес кәсіпорындардан тағайындалған жастар ұйымдарының өкілдері есеп беретін болады. Бұл істе Ілиястың орынбасарлары Гүлжан Датбаева мен Әсем Қайратқызының жетекшілігімен тыңғылықты жұмыс жүргізілуде. Тағы бір тұшымды жаңалық Семей өңірлік Жастар кеңесінің құрамы 100 пайызға жаңарыпты. Бұл ретте өз жұмыстарын абыроймен жүргізген кеңестің бұрынғы өкілдері «Орнымызды ізбасар жастарға берелік, жүйе де, жұмыс та жаңарсын» деген ұйғарымға келген. Жастар ұйымының басшысы сонымен қатар алдағы жоспарларымен де таныстырып өтті. Бұл ретте бірқатар межелі шаралар бөлімше басшылығымен тыңғылықты ойластыруды қажет етеді. – Мәселен, алдағы жылдың Президент Жолдауында айтылғандай еріктілер жылы болуы себепті Жастар ұйымының жұмыстарын осы бағыт бойынша жүйелеу қажет. Бастысы теміржолшы жастар еліміз бойынша қолға алынған саяси-әлеуметтік шаралардан шет қалмауы тиіс, – дейді Ілияс Несіпқамит. Белсенді жастардың игілікті бастамалары әлі де пысықталмақ. Яғни, осы айдың соңына дейін алдағы жылдың жоспарлы шаралары кесте түрінде әзірленіп бөлімше басшылығы тарапынан бекітілетін болады. Ал жастар тізе қосса, тау қопаратындарына сенімді. Ұрандары – «Біз алмайтын қамал жоқ».