Қайта түлеген Арыс вокзалы

Биыл маусым айында болған жарылыстан кейін Арыс қаласы қайта салынды десек болғандай. Төтенше апаттан қираған әлеуметтік маңызы бар ғимараттардың көпшілігі, теміржолға қарасты мекемелер, вокзалдар аз уақытта қалпына келтірілді. Соның ішінде Арыс-1 вокзалы да жөндеуден өткізіліп, қайта түлеген ғимарат бүгінде пайдалануға берілді.

Арыс вокзалының тарихы тым әріде жатыр. Ғасырдан да үлкен вокзалға 115 жыл толыпты. Кешегі жарылыстың салдарынан есік-терезелерінің сынып, зардап шеккені арыстықтардың ғана емес, барша жұртты қынжылтқаны рас. Себебі, вокзал мемлекеттің қорғауында тұрған тарихи жәдігер болатын. Алайда, Үкіметбасы Асқар Маминнің пәрменімен қайта жөндеуден өткен вокзал бұрынғысынан да асқақтап, еңсесі биіктеп, жаңарып-жасара түскендей. Айта кетейік, вокзалдың жөндеу жұмыстарын «Асбест строй» компаниясы жүргізген.

«Аз уақыттың ішінде өте сапалы жұмыстар жүргізілді. Жалпы, құрылысты жүргізген компанияға көңіліміз толды. Вокзалдың ішіне барлық қажетті жағдайды жасап берді. Суық су, ыстық су бар. Аналар мен балалар бөлмесі бар. Тағы бір ерекше айтып өтетіні, мүгедектерге арналған бөлме ашылды. Олардың әжетханасының өзі, қол жуатын жері, барлығы стандартқа сай. Одан бөлек, күту залында мүгедектерге арнап касса мен сырт жақта кіреберісте стандартқа сай пандус жасалды. Өрт болған жағдайда қосымша шығып кететін есік пен іске қосылатын сигнализация, бейнекамера орнатылды. Бұрын камералар да жоқ болатын», – дейді вокзал басшысының міндетін уақытша атқарушы Шерехан Бексұлтан.

Арыс-1 вокзалына бір мезетте 100-ден аса адам сыяды. Жергілікті халық бірінші Арыс вокзалынан тәулігіне 30-40 билет алады. Мұнда негізінен халықаралық пойыздар өтеді, ал қазақстандық пойыздар көбіне екінші Арыстан өтеді. Арыс-1 вокзалында жолаушылар ағыны аздау болғанымен, табыс екінші Арыстан көп түсетін көрінеді. Себебі, халықаралық бағыттағы пойыздарға билеттің құны 40-50 мың теңгеге дейін барады. Айталық,Ресейге, Өзбекстанға, Қырғызстанға қатынайтын пойыздар өтеді. Билетті онлайн түрде алуға болғанымен, жергілікті халық әлі толық үйреніп кете алмаған сыңайлы.

«Жалпы Арыста онлайн билет алатындар аз, қарапайым халық өздері үйренген әдіспен, вокзалға келіп кезекке тұрып қағаз билет алғанды дұрыс көреді, – деп күлді вокзал бастығы, – Онлайн билет алса да жолаушылар сенімсіз, жарамды ма, жарамсыз ба, біліп беріңізші деп бізге келетіндер де бар».

Бүгінде ажары ашылып, көркейе түскен вокзалда тазалық пен тәртіп орнап, халыққа қажетті қызмет түрлері, касса, терминал, банкомат түгел үздіксіз жұмыс істеп тұр.