Үлес қосқан қызметкерлер марапатталды
Абай облысы бойынша меншікті тілші
Биылғы Тәуелсіздік мерекесін семейлік теміржолшылар әдеттегі дәстүрге сай айрықша атап өтті. Ұлық мереке құрметіне салтанатты жиын өтіп, отандық теміржол саласының өркендеуіне елеулі үлес қосқан қызметкерлер марапатталды.
Кең көлемде ұйымдастырылған мерекелік басқосуға сала ардагерлерінен бастап жастар қауымы, желі бойындағы барша теміржолшылар жиналған болатын. Салтанатты шараны Семей ЖТ бөлімшесінің басшысы Марлен Көкірекбаев ашып, жыл үлесіндегі жетістіктерге шолу жасап өтті. Ел егемендігінің 28 жылындағы ұлттық компания қол жеткізген табысты еңбекке тоқталды. Сондай-ақ, жүк тасымалы мен қауіпсіздік шаралары бойынша жоғары деңгейдегі көрсеткіштерді де тізбектеп өтіп, көпшілікті айтулы мерекемен құттықтады. Мұндай салтанатты шаралар марапатсыз өтпей-тіні белгілі. Бұл жолы да еңбекте табысқа жеткен бірқатар семейлік теміржолшылардың абыройлары асқақтады. Атап айтсақ, Көл станциясының бастығы Қайрат Тілеубаев «Адал еңбегі үшін» төсбелгісін өңіріне тақты.
Ал «ҚТЖ» ҰК» АҚ Басқарма төрағасының Құрмет грамотасымен тепловоз машинисі Амангелді Олжабаев, ШЧ-29 мекемесінің СЦБ электромеханигі Берікхан Жакупов марапатталды. Тағы бірқатар теміржолшылар Басқарма төрағасының Алғыс хатын иеленді. Мұнымен қатар, көптеген теміржолшылар бөлімше басшылығының, салалық кәсіподақ ұйымының алғыс хаттарымен марапатталды. Өз кезегінде Семей магистральдық желі бөлімшесінің басшысы Айдын Шәукежанов пен салалық кәсіподақ ұйымының төрағасы Алик Досанов та теміржолшыларды құттықтап, мерекелік ізгі тілектерін білдірді. Мерекелік шара барысында Семей өңірлік жастар ұйымы мүшелерінің әзірлеуімен 1986 жылғы Желтоқсан оқиғасынан музыкалық композиция сахналанып, ел тарихындағы ерекше күн жайлы тұшымды мағлұмат берілді. Бұл ретте жастар қауымы даярлаған сахналық қойылым көпшілік көңілінен шығып, қошемет білдіріп, қол соқты. Ыстық ілтипатқа толы салтанатты кеш өнерпаз теміржолшылар мен олардың балалары әзірлеген мерекелік концертпен жалғастық тапты.