Еңбек қорғау ережесіне сай
Өткен жылы Арыс станциясы қауіпсіздікті қамтамасыз ету бойынша атқарылған кешенді шаралар жоспарға сәйкес толығымен және бәрі еңбек қорғау ережесіне сай орындалды.
Жұмысшылардың еңбек қорғау бойынша білімі тексеріліп, оқытудан 281 адам өткен. 263 теміржолшының электр қауіпсіздігі жөнінде білімі тексерілді.
Бұдан бөлек, жоспардан тыс 689 тексеру өткізіліп, 39 бұзушылық анықталды, 5 адамға сөгіс берілді. Медициналық тексеруден жоспар бойынша 266 болса, іс жүзінде 260 адам өткен. Ал күнделікті ауысым алдында 73 адам медициналық қараудан өтеді.
«Жолда адам» ақпараттық жүйесі бойынша жұмыстың тиімділігі ай сайын қадағалаудан өтіп тұрады. Өткен жылы аталған жүйе бойынша ешқандай бұзушылық орын алмаған. Желілік ішкі істер бөлімінің қызметкерлерімен бірлесіп, станция маңайында тұратын тұрғындармен жиі кездесу өткізіледі. Ондағы мақсат – халықты теміржолдағы қауіпсіздіктен сақтандырып, қайғылы оқиғаларды болдырмау. Түсіндіру жұмыстары барысында Арыстағы мектеп оқушыларын да қамтып, теміржол туралы көбірек ақпарат беру қолға алынған. Еңбек қауіпсіздігі инженерінің айтуынша, қазіргі жастар, өкінішке орай, теміржолда қауіпсіздік ережелерін сақтай бермейді, ұялы байланыстың құлаққабын жиі тағып алатындықтан, пойыздың келе жатқанын естімей қалып жатады екен. Жалпы, Арыс станциясында 320 жұмысшы бар. Мұнда жоспардан тыс инструктаж тұрақты түрде өткізіліп тұрады. Оны мақсатты түрде әр ауысым алдында станция бастығының өзі өткізеді.
«Жаңадан келген жұмысшыларға кіріспе түрде сабақ өткіземін. Сонымен қатар, жұмыс формаларының, қыстық-жаздық киімдердің 100 пайыз толық жеткізілуін қадағалаймын. Айталық, дөңес кезекшісі, операторлар, диспетчерлер формаларын сатып алады, ал қалған киімдер тегін беріледі. Аяқ киімнен етік, резеңке етік, бәтеңке, машинист алыстан көріп басып кетпеу үшін берілетін сигналды желетка, сары шапкалар, т.б. Тағы бір айта кетерлігі, экологияны таза ұстау мақсатында жыл сайын кеңседегі артық қағаздарды макулатураға өткіземіз», – дейді Арыс станциясының еңбек қауіпсіздігі инженері Базаркүл Махмутова.
Айта кетейік, өткен жылдың 1 наурыздан 31 желтоқсанға дейін барлық аймақтағы Жүк тасымалы бөлімшелерінде «Жасыл жұма» атты экологиялық акция ұйымдастырылған болатын. Осыған орай, Арыс станциясында міндетті түрде эко-жәшіктер орнатылып, оларға пластик, шыны және қағаздар салынған.