Мақат станциясында перрондар жаңартылады
Атырау облысы бойынша меншікті тілші
«Кластан тыс» станция дәрежесі бар Мақат станциясы тоғыз жолдың торабы саналады. Мұнда республикалық және халықаралық дәрежедегі 14 жұп пойыз өтеді.
Соның ішінде «Куляб-Мәскеу», «Ташкент-Волгоград», «ДушанбеМәскеу», «Ташкент-Үргеніш-Саратов», «Худжанд-Мәскеу» транзиттік пойызда ры, «Атырау-Құлсары» жұмысшы пойызы, «Жолаушылар тасымалы» АҚ-на қарасты Тальго вагондарынан құралған «Атырау-Алматы», «Атырау-АстанаНұрлы жол», «Атырау-Алматы-1», «Атырау-Астрахань», «Атырау-Маңғыстау», «Атырау-Ақтөбе» пойыздары бар.
Жолаушыларға қызмет көрсететін 50 орындық Мақат вокзалы 1966 жылы салынған, бірақ 2014 жылы жөндеуден өтіп, қазіргі кейпі жаман емес. Әйтсе де, станция тұрғындары мен жолаушылар перронның қолайсыздығы туралы жергілікті атқару органдарына және темір жол басшыларына көптен айтып келеді.
Пойызға мініп-түсу қолайсыз, өте төмен. Вокзал аймағы да жазда құмшаң, қыста балшық-сор болып жатады. Сол себепті облыс әкімдігімен вокзал маңын қайта жаңғыртып, жаңа перрон салу үшін жобалау-сметалық құжаттамасы жасақталып, мемлекеттік сараптамадан оң қорытындысын алған. Сондай-ақ, Доссор вокзалының перроны да талапқа сай емес. Соған сәйкес, жергілікті бюджет есебінен перрон құрылысына Мақат вокзалына 519 млн теңгеге, ал Доссор станциясына 127 млн теңге бөлініп, жүзеге асырылмақ.
Бұл туралы Мақат ауданы әкімінің жылдық есебінде айтылды.
Жалпы, Атырау магистральдық желі бөлімшесінің қарамағында 16 темір жол вокзалы мен 37 жолаушылар платформасы бар. Олардың бәрі билет кассаларымен және басқа да міндетті қызмет көрсету түрлерімен қамтамасыз етілген. Солардың ішінде тозығы жеткені Сағыз және Құлсары вокзалдары болатын. Өткен жылы Сағыз темір жол вокзалы ғимараты, оның құрылыс ауданы мен жолаушыларға қызмет көрсету сапасы техникалық тексеруден өтіп, нәтижесінде жаңа вокзал тұрғызу үшін жобалық-сметалық құжаттарын жасақтауға жіберілді. Ал 2018 жылдың сәуір айында жеке кәсіпкер С.Балжігітовтың бастамасымен көлемі 714 шаршы метр болатын Құлсары жаңа темір жол вокзалы құрылысы басталды. Сонымен қатар, 2022 жылға дейін бөлімше бойынша Ганюшкино, Аққыстау, Доссор, Мақат вокзалдары жөндеуден өтеді деп күтілуде.