Деподан шыққан дау
«ҚТЖ-Жүк тасымалы» АҚ филиалы – Ақтөбе локомотив пайдалану депосының жүзден аса жұмысшысы наразылыққа шықты. Еңбек шартының орындалмай отырғанын және жұмыста қысым көргенін айтқан машинистер мен олардың көмекшілері басшылықтың жұмыстан кетуін талап етті.
Осы мәселелге байланысты, яғни локомотив пайдалану депосының қызметкерлерінен депо директоры Талғат Медеубаев пен оның орынбасары Аманбай Советбаев тарапынан орын алды делінген өрескел әрекеттерге қатысты келіп түскен арыз-шағымдарды тексеріп, ақиқатқа көз жеткізу үшін сәрсенбі, 29 қаңтар күні «ҚТЖ-Жүк тасымалы» АҚ орталық аппаратының қызметкерлері, атап айтқанда құрамында бас директордың корпоративтік мәселелер жөніндегі орынбасары А.А.Исмухамбетов, Атқарушы директор – локомотив шаруашылығы департаментінің директоры М.К.Ибраев және өзге де қатысты мамандар жолға шыққан болатын.
«ҚТЖ-Жүк тасымалы» АҚ орталық аппараты басшылығы аталған депоның еңбек ұжымымен кездесу өткізіп, кездесу барысында Т.Ж.Медеубаев пен А.С.Советбаев қызметтік лауазымдарынан жағдай егжей-тегжейлі анықталғанға дейін, яғни 3 ай уақыт мерзіміне шеттетілді», деп хабарлайды «ҚТЖ-Жүк тасымалы» АҚ жауапты өкілі.
Ақтөбе локомотив пайдалану депосының директоры жоқ кезінде оның қызметін уақытша атқару міндеті 2020 жылдың 30 қаңтарындағы №78 бұйрығымен депо бас инженері Е.Б.Құсниязовқа жүктеліпті. Ал «ҚТЖЖүк тасымалы» АҚ филиалы – Ақтөбе жүк тасымалы бөлімшесінің директоры Б.С.Беркімбаевқа осындай арыз-шағымдарға жол бермеу үшін депоның еңбек ұжымымен ай сайын түсіндіру жұмыстарын жүргізуге нұсқау берілген.
Бүгінде 800-ден аса адам еңбек ететін депода, сонымен қатар облыстық еңбек инспекциясы мамандары да теміржолшылар арызында келтірілген заңбұзушылықтардың қаншалықты растығын анықтау жұмыстарын жүргізуде.