Айлықтар нәтіжесін беруде

Үстіміздегі жылдың алғашқы үш айында Астана вагон пайдалану депосы бойынша 20 257 пойызға техникалық қызмет көрсетіліп, 20 342 вагон жүк тиеліміне берілген.

Қазір депода өткен жылы 23-желтоқсанда басталып, төрт айды қамтитын «Бүйір рамасын бақылау айлығы» өтіп жатыр. Сонымен қатар биылғы 1 наурыздан басталып, 31-де аяқталған «Ерекше бақылау – тежегіш жабдығы» айлығы да өз мәресіне жетті.

«Вагон қарау сапасын арттыруға тигізер әсері мол бұл айлықтар барысында бақылау мен тәртіп бұрынғыдан да күшейе түсті. Соның арқасында үлкенді-кішілі, тіпті иненің жасуындай көзге көрінер-көрінбес ақаулар да табылып жатыр. Мысалы, осы жылдың 12 ақпанында күндізгі 14 сағат 50 минут шамасында Дөңесалды паркі техникалық қызмет көрсету пунктінің вагон қараушысы Б.Айтуғанов №2943 жүк пойызының №28082782 вагонынан бүйір рамасының білінер-білінбес жарығын анықтады. Мұндай мысалдарды көптеп келтіруге болады», – дейді Астана вагон пайдалану депосының инженер-технологы Дархан Ахитов.

Оның айтуынша, үстіміздегі жылдың үш тоқсанында 50 техникалық сабақ өтіп, 900-ге жуық жұмысшы қамтылған. Техникалық сабақ барысында вагон қараушылармен бірге букстық тораптар, онда ақаулықтардың пайда болу себептері, букс торабының құрылымы мен міндеті, вагондарға жөндеу жүргізу және техникалық қызмет көрсету барысында қауіпсіздік техникаларының негізгі талаптары, ISO 9001, ISO 14001, OHSAS 18001, ISO 50001 стандарттарының орындалуы сияқты бекітілген тақырыптар қамтылған.