Ақтөбедегі темір жол вокзалы халықаралық талапқа сәйкестендіріліп келеді
Ақтөбе облысы бойынша меншікті тілші
Теміржол вокзалы – кез келген қаланың табалдырығы. Сондықтан оның тап-таза айнадай жарқырап жатуы, айналасы абаттандырылып, жайнап тұруы қалаға қадам басқан жолаушыға әдемі әсер сыйлайды. Биыл Ақтөбе вокзалы маңына орнатылған шамдар айналаны жарқыратып, жаңа аллея әсем саябаққа айналды. Тоғыз жолдың торабында орналасқан облыс орталығының теміржол вокзалының іші-сыртын жаңарту, абаттандыру мәселелеріне баса назар аударылып отыр. Стратегиялық нысанның айналасында бұрынғыдай заңсыз сауда жасаушылар мен қаңғыбастар мүлде жоқ. Теміржол бойын шөптен тазалау, перронды, вокзал маңын жарықтандыру, белгілерді жаңарту, сырлау жұмыстары жаз бойы қарқынды жүрді.
«Инженерлік инфрақұрылым қаланы одан әрі дамытудың фундаменті болып табылады. Ақтөбе вокзалы арқылы бір күнде мыңдаған адамды қабылдап шығарып саламыз. Жолаушыларға жайлы жағдай жасау басты міндетіміз болғасын биыл вокзал айналасында ауқымды өзгерістер енгіздік. Жергілікті қала әкімдігімен вокзал алдына аллея салынды. Қазір Кереев көшесі жарқырап тұр. Жолаушыларға да ерекше көңіл-күй сыйлайды. Әсемдікті сақтау үшін вокзал қызметкерлері сенбі сайын кезекпен сенбілікке шығады», – дейді Ақтөбе теміржол вокзалының басшысы Тойбазар Қуанышев.
Сонымен қатар, перрондағы мүжілген тұстар қалыпқа келтіріліп, вокзал ішіне толықтай ыстық су жүргізіліпті. Екінші қабаттағы ескірген жылу құбырлары жаңартылып, ескі кафельдер ауыстырылған. Ағымдағы жөндеу жұмыстары кезінде ТБО жәшіктері де жаңартылған.
«Биыл вокзал сыртында да, ішінде де көп жұмыстар жүргізілді. Әсіресе , жолаушылар жүгі сақталатын 0-қа- баттағы қойма толық жөндеуден өтті. Бұл жердегі ескі едендер алынып, кафель төседік. Төменгі қабатқа да ыстық су жүргізілді. Вокзал халықаралық талаптарға сай жұмыс істеп тұр», – дейді вокзал басшысы.
Елдегі пандемия жағдайына байланысты Ashyq бағдарламасымен жұмыс жасап тұрған вокзалда барлық санитарлық талаптар сақталған. Жолаушылар мен оларды шығарып салушылардың дене қызуы өлшеніп, Ashyq бағдарламасымен ғана кіргізіледі.