Ақтөбедегі өрттің кесірінен пойыздар 3 сағат кешігуге мәжбүр болды
Ақтөбе облысы бойынша меншікті тілші
Ақтөбе облысының Әйтеке би ауданы аумағында екі күнге созылған далалық өрт теміржолға да қауіп төндірді. Қауіпсіздік үшін жолаушылар пойызы екі сағатқа кідіруге мәжбүр болды. Облыстық төтенше жағдай қызметінің мәліметінше, дала өртінің ауданы 15 мың гектарды құрады. Әзірге өрттің шығу себебі белгісіз. Адами фактор болуы да мүмкін. Ақтөбенің Әйтеке би және Хромтау аудандары аумағында болған дала өртін сөндіру жұмыстары екі күнге созылды. Дала өрті теміржолға да қауіп төндірді. Оқиға 6 тамыз күні таңғы сағат 6:00-де Жоса-Құдықсай телімі бойынша теміржолға өрт қаупі төніп келеді деген хабарлама түскен сәттен басталды. Ақтөбе жол бөлімшесінің бұйрығымен тез арада Әйтеке би өрт сөндіру пойызы оқиға орнына жөнелтілді. Ақтөбе мемлекеттік емес өртке қарсы қызметінің бастығы Әділ Құбаевтың айтуынша, белгіленген уақытта Жоса станциясына келген өрт сөндіруші жасақ бірінші күні тек кезекшілікте тұрған. Далалық өрт Жоса станциясына кемі 600 метр қашықтықта жанып жатты. Тасөткел селолық округы тұрғындарынан құралған ерікті құтқарушылар өртпен күресіп жатты. Өрт теміржолға қауіпсіз болғандықтан Әйтеке би өрт сөндіру пойызы төрт сағат кезекшілікте тұрып, кейін қайтып кеткен. Бір тәуліктен асқанда «далалық өрт теміржолға қауіп төндірді» деген дабыл қайта қағылып, Әйтеке би өрт сөндіру пойызы 12 адаммен оқиға орнына жедел аттанады. Жел бағыты өзгеріп және күшеюіне байланысты теміржолға да қауіп төне бастайды. Марс Ержанов бастаған Әйтеке би өрт сөндіру пойызының жеке құрамы қызыл жалынды теміржолға жақындатпауға бар күшін салды. Олар өрт сөндіру пойызындағы 50 тоннадан екі цистерна суды түгел тауысқан. «Өрттің өршіп кеткені сондай, жолаушылар пойыздарын қауіпсіздік үшін 2-3 сағатқа кідіртуге мәжбүр болдық. Әйтеке би өрт сөндіру пойызы Арқа, Әйтеке би, Никельтау аймағындағы теміржол бойын өрттен қорғайды. Оған мүмкіндігі толық жетеді. Дегенмен, алдағы уақытта Қарабұтақ елді мекенінен өрт сөндіру депосын ашса, құба құп болар еді. Облыс әкімшілігі өткен жағдайды сараптап, осыған көңіл бөлсе екен», – дейді Ақтөбе мемлекеттік емес өртке қарсы қызметінің бастығы Әділ Құбаев. Төтенше жағдайлар қызметі өрт найзағайдан тұтануы мүмкін деген нұсқаны да жоққа шығармады.