Шалқарлық теміржолшылар бір отбасының баспаналы болуына ұйытқы болды
Ақтөбе облысы бойынша меншікті тілші
Теміржолшылар қаласы атанған Шалқарда қайырымдылық жәрмеңкесі өтіп, көп балалы отбасыға 2 бөлмелі пәтер кілті табысталды. Жүрек жылытар игі шараның ұйымдастырылуына жергілікті вагон депосының ұжымы мұрындық болды.
Шалқар вагон депосы наурыз мерекесі аясында өткен 10 күндік іс-шара жоспарына сай «Игі істер» күнін, расымен, игілікті де сауапты шараға айнал- дырды. Шалқардағы теміржол мекемелері аудан орталығындағы техникалық колледж ауласына киіз үй тігіп, қайырымдылық шарасын ұйымдастырды. Жиналған қаражатқа көпбалалы отбасынан шыққан колледж студентіне екі бөлмелі пәтер сатып алынды.
Мерекелік шараға барлық ұжым мүшелері қазақтың ұлттық киімін киіп келіп, мереке ажарын аша түсті. Аулаға ағаш үй тігіліп, мал сойылып, қазан асылды, наурыз көже пісірілді. Теміржолшылар ауыл-ауылға бөлініп, ұлттық дәстүрімізге негізделген қыз ұзату, бесікке салу, қырқынан шығару дәстүрлерін сахналап, ойындар ойнатылды.