Ақтөбе вокзалына келген жолаушылар наурыз көжеден дәм татты
Ақтөбе облысы бойынша меншікті тілші
Ақтөбе магистральдық желі бөлімшесінің ұйымдастыруымен Ұлыстың ұлы күні теміржол вокзалында келген-кеткен жолаушыларға наурыз көже мен бауырсақ таратылды.
Наурыз көже – Ұлыстың ұлы күнінің символы. Жеті түрлі дәмнен жасалатын тағамды ырымшыл халқымыз «құт-береке келсін» деген ниетпен әзірлейді. Ұлттық дәм бұл күні Ақтөбе теміржол вокзалына жолы түскен барлық жолаушыларға ұсынылды. Ұлттық киімде жүріп қызмет жасап, мерекелік көңіл-күй сыйлаған теміржолшылар ақжаулықты аналар мен үлкен кісілердің батасын алды.
«Наурыз мерекесі құтты болсын. Елімізде бейбітшілік болып, жылдан жылға аман жетейік. Жолаушылардың атынан теміржол қызметкерлеріне алғысымыз шексіз. Дастарханымыз кең, асымыз мол болсын. Еңбектеріңіз жемісті болсын, қымбатты теміржолшылар», – десті вокзал алаңына жайылған наурыз көжеден дәм татқан жолаушылар.
«Ұлтымыздың мерейін өсіріп, болмысымызды айшықтайтын қасиетті Наурыз мерекесі елімізге, әрбір отбасына бірлік пен қуаныш, құт-береке, бақыт пен молшылық әкелсін! Карантиндік жағдайға байланысты екі жылдан бері ұлттық мерекемізді өз деңгейінде тойлай алмай келеміз. Еліміз індеттен аман болып, әлемде бейбіт заман болсын», – деді Ақтөбе магистральдық желі бөлімшесінің қызметкері Айша Ербайқызы.