Ақтөбеде теміржолшыларды әлеуметтік қолдау аясында 300-ге жуық бала жазғы лагерьде демалды
Ақтөбе облысы бойынша меншікті тілші
Ақтөбе магистральдық желі бөлімшесі теміржолшыларды әлеуметтік қолдау саясаты аясында балалардың жазғы демалысын ұйымдастыруды ойдағыдай аяқтады. Барлығы 300-ге жуық бала жазғы лагерьлерде демалды.
Бөлімшеге берілген 286 жолдаманың бір бөлігі Орал аймағындағы теміржолшылардың балаларына таратылды. Балалар өзен жағасында орналасқан, табиғаты демалыс үшін қолайлы «Шұғыла» лагерінде демалды. Бүлдіршіндерді қуантқан жаз қызығы мәресіне жетіп, өткен аптада ең соңғы топ аман-есен оралды.
– Аймақтағы теміржолшылар балаларының жазғы демалысын ұйымдастыру мақсатында лагерьге жіберу биыл да жыл сайынғы үрдіспен өтті. Балалардың денсаулығы мен қауіпсіздігі толық қамтамасыз етіліп, үш маусымда да кәсіподақ қызметкерлерінің бақылауында болды. Ата-аналар тарапынан да ешқандай шағым болған жоқ. Жазғы лагерьде қызық күндерін өткізіп, жаңа достар тапқан балалар да қуанышты. «Келесі жылғы каникулды асыға күтеміз» деп қимай қоштасты, – дейді Ақтөбе магистральдық желі бөлімшесі кәсіподақ ұйымының төрағасы Айша Қалағанова.
Иә, ұмытылмас естеліктер қалдырған жазғы лагерьден оралған балалар бүгінде мектепке дайындалып жатыр.