Маңғыстаулық теміржолшылар отбасы Астанадағы байқаудан жүлдемен оралды
Маңғыстау облысы бойынша меншікті тілші
Астана қаласында өткен «Әкем, Анам және мен» атты байқаудан маңғыстаулықтардың қанжығасы майланып қайтты. Елдің түкпір-түкпіріндегі теміржолшылар отбасынан жиналған жиырмадан астам команданың ішінен жүлделі орынды жеңіп алды.
22 команда қатысқан отбасылық байқауда түбек теміржолының атынан Ақтау қаласынан барған Аралбаевтар жанұясы үшінші орыннан көрінді. Теміржолшылар әулетінен шыққан отағасы Маңғыстау локомотив депосында көмекші машинист. Он бір жылдан бері локомотив шаруашылығында еңбек етіп жүрген ол бұл жарысқа әйелі Жадыра Аймағанбетова және ортаншы ұлы Аңсармен барыпты.
Спортты жанына серік еткен жерлесіміз Серіктің жанұясы байқаудың шарттарын орындауда өз мықтылығын дәлелдеді. Топтық және жеке ойындар барысында бір-бірін үнсіз ұғысып, жеңіске жетелеген олар қай шартты болса да ауызбіршіліктің арқасында ойдағыдай орындап шыққандарын айтады. Нәтижесінде байқаудың жеңімпазы атанып, 110 мың теңгенің жүлдесін алып қайтты.
– Бұл сапар бізге тек байқауға қатысу ғана емес, жазғы саяхат та болды. Елордамыздың көрікті жерлерін аралауға мүмкіндік туды. Конкурс шарты бойынша он жастан асқан бала болу керек дегендіктен біз төрт баламыздың ішінен спортқа жақын, боксқа қатысатын 5-сыныпта оқитын ұлымызды алып кеттік. Өзім баскетбол ойнаймын. 3-4 жылдан бері түбек теміржолшыларының командасындамын. Жақында жергілікті жарыста біздің баскетболшылар командасы бірінші орынды алды. Келіншегім үйде, бала тәрбиесімен айналысады. Бәріміз бірге және әке мен ұл болып, аналардың арасында тартысты шарттарды орындадық. Бәрі де қызықты өтті, өзіме қатты ұнады. Отбасының бір-бірімен арадағы қарым-қатынасын нығайтып, татулығын паш ететін ойын болды, – дейді Серік Аралбаев.