Отбасылық сайыста қандыағаштық команда жеңіске жетті
Ақтөбе облысы бойынша меншікті тілші
Қандыағаш станциясының теміржолшылары «Әкем, анам және мен» атты отбасылық сайыста бақ сынады. Салауатты өмір салтын насихаттаған шара теміржолшылардың ынтымағын арттыра түсті. Теміржолшылардың отбасылық байланысын нығайтып, әр шаңыраққа рухани және мәдени мереке сыйлаған сайыс өте қызықты өткені сол, оған қатысуға ниет білдіргендер де аз болмады. Бірақ, оған іріктелген үш отбасы қатысып, өзара бақ сынады. Әр отбасы жеке топты, яғни бір команданы құрайды. Олар жеңіс мәресіне жету үшін бірнеше кезеңнен тұратын кедергілерге төтеп беруі тиіс болды. Жеңіс жолында барын салған отбасылардың осалы болмады. Дегенмен, дайындығы жоғары, бұрыннан спортқа жақын Қандыағаш жол дистанциясының қызметкері Валера Тәжібаевтың отбасы барлық кедергілерден оңай әрі сүрінбей өтіп, жеңіске жетті. Екінші және үшінші орынды Қандыағаш әскерилендірілген күзет мекемесінің өкілі Смағұловтар отбасы мен Қандыағаш белгі беру және байланыс дистанциясының қызметкері Аманқұловтар отбасы бөлісті.
«Әкем, анам және мен» сайысы, атының өзі айтып тұрғандай, салауатты өмір салтын ұстанатын теміржолшылардың отбасының мерейін арттыратын тәрбиелік маңызы зор ойын-сауық бағдарламасына айналды. Әкесі мен шешесіне қоса балалары да қатысып, жеңіс жолында күш біріктіретін сайыс отбасы құндылығын арттырып, татулығын бекемдеп, дені сау ұлттың қалыптасуына әсер етпек. Бүгін сайысқа қатысқан отбасылар шебер ойын үлгісін көрсетіп, жанкүйерлерін әбден риза етті. Шара отбасылық мерекеге айналғандай болды, – дейді спорт нұсқаушысы Нұргүл Батырхан.