Ақтөбе станциясында отбасылық командалар арасында спорттық сайыс өтті

Ақтөбе станциясында «Әкем, шешем және мен» атты отбасы мүшелерінен құралған спорттық сайыс өтті. Салауатты өмір салтын насихаттаған шара ел Тәуелсіздігінің 30 жылдық мерейтойына орай ұйымдастырылған. Ұжымдық бірлік пен отбасылық ынтымақтастықты нығайтуға бағытталған спорттық додаға жергілікті теміржолшылар арасынан үш отбасы қатысты. Барлық отбасы мүшелері бірдей формада киім киіп, бір командада өнер көрсетті. Жанкүйерлер – әр команданың ұжымы. Жылдамдық пен шапшаңдықты қажет ететін бәсекелі жарыс жолына шыққан командалардың ойыны қызу да тартысты өтті. Әсіресе, ВЧД-4 вагон депосының атынан жарысқа қатысқан Майқараевтар отбасы жеңісті ешкімге бермей, жүлделі бірінші орынды иемденді. Ақтөбе ЖТ бөлімшесі атынан шыққан Қалиевтер жанұясы екінші орынды алса, «Жолаушылар тасымалы» АҚ жергілікті филиалы атынан қатысқан Атыраубаевтар отбасы үшінші орынды місе тұтты. Барлық командаларға бағалы сыйлықтар берілді.

«Ел тарихындағы айтулы мереке қарсаңында теміржолшыларға рух беру, ауызбіршілігін арттыру, ұжымдық қана емес, отбасылық байланысты нығайта отырып, салауатты өмір салтын арттыру – шараның негізгі мақсаты. Себебі «өмір негізі – денсаулық, ал денсаулық негізі – спорт» деген тәмсіл дәл бүгінгі таңда өзекті болып тұрғанын уақыт өзі дәлелдеп отыр», – дейді Ақтөбе бөлімшесінің спорт нұсқаушысы Нұргүл Батырхан.

Спорт нұсқаушысының айтуынша, Тәуелсіздіктің 30 жылдық мерейтойына орай ұйымдастырылатын спорттық шаралар мұнымен шектелмейді. Алда тағы бірнеше сайыс күтіп тұр.