Ақтөбеде теміржолшылар мен сала ардагерлері арасындағы волейбол турнирі аяқталды
Ақтөбе облысы бойынша меншікті тілші
Ақтөбе жол дистанциясының еңбеккерлері мен ардагерлері арасында волейболдан жарыс өтті. Шара "KAZPROFTRANS" ұйымының 30 жылдығы мен еңбек ардагері Зейнулла Тайғұловтың 80 жылдығы құрметіне арналды, деп хабарлайды Rail-news.kz.
Салауатты өмір салтын қолдап, әрдайым спорттық шараларда белсенділік танытатын ардагер теміржолшылар бұл жолы да үздік ойын үлгісін көрсетіп, әріптестеріне үлгі болды. Сайыс соңында жүлдегерлерге естелік сыйлықтар мен марапаттар табыс етілді.
Зейнулла Тайғұлов – өмірінің ширек ғасырын теміржол саласына арнаған жан. Еңбек жолын 1966 жылы Маңғышлақ жол дистанциясында бастаған жолшы көпір шебері, жол шебері, аға жол шебері болған. Кейін Гурьевте жол бөлімшесі басшысының орынбасары, жол дистанциясының бас инженері болды, Қандыағаш жол дистанциясында талай жыл еңбек етті. Батыс аймақтық жол шаруашылығында талай шәкірт тәрбиелеген ұстаз.