Теміржолшылар арасында дәстүрлі спартакиада өтіп жатыр

«ҚТЖ» ҰК» АҚ Әлеуметтік саясат департаментінің ұйымдастыруымен биыл 25 қараша мен 9 желтоқсан аралығында Астанада теміржолшылар арасында спорттың бірнеше түрінен дәстүрлі спартакиада өтуде. Оған компанияның Орталық аппараты, филиалдары мен еншілес ұйымдар қызметкерлерінен жинақталған 24 команда қатысып, 7 спорт түрінен бақ сынасуда.

Атап айтқанда, астаналық теміржолшылар волейбол, шағын футбол, баскетбол, үстел теннисі, асық ату, тоғызқұмалақ, арқан тартудан жарысып жатыр. Алғашқы жарыс өткен сенбіде волейболдан басталды. Спартакиаданың ашылу салтанатына компанияның аппарат басшысы Серік Кеулімжаев пен «Қазкөліккәсіп» ҚБ төрағасы Оразғали Ахметбаев қатысып, спортсүйер теміржолшыларға сәттілік тіледі.  

– Спартакиада мақсаты – компания қызметкерлері арасында ішкі корпоративтік командалық рухты көтеру, салауатты өмір салтын насихаттау және республикалық, халықаралық деңгейдегі спорт додаларына мықты спортшылар іріктеп, жинақтау. Баршаңызға алдағы спорттық жарыстарда күш пен қайрат серік болсын, ең мықтылардың жеңуіне тілектеспіз, – деді аппарат басшысы.  

Волейболға 19 команда қатысып, олар жарысу барысында 5 ішкі топқа бөлінді. Екі алаңда ойнаған олар тек бір ішкі топта 3 командадан, қалған топтарда 4 командадан бөлініп ойнады.  

– ҚТЖ өз қызметкерлерінің спорттың қай түрінен болсын шынығып, жаттығуына барлық мүмкіндікті жасайды. Қызметтен бөлек спортпен шұғылдануға компанияда жағдай бар. Себебі спортқа бейім адамның дені сау болады, ал денсаулығы мықты қызметкердің жұмысқа да бейімі зор келеді, – дейді Әлеуметтік саясат департаментінің менеджері Ольга Липчанская.

Волейболға «ҚТЖ-Жүк тасымалы» ЖШС, Қырқыншы станциясы, «Теміржолсу» және ЭЧ-8 мекемелері, Көпфункционалды қызмет көрсету орталығы, Әскерилендірілген теміржол күзеті қызметі, «Нұрлы жол» вокзалы, Қала маңы тасымалы, Жолаушылар локомотиві кәсіпорны, Кедентранссервис және басқа да теміржол ұйымдарының қызметкерлері қатысты. Ойын нәтижесінде 1-орынды Астана станциясының «ДС-Астана» командасы жеңіп алса, 2-орынға Магистральдық желі дирекциясының «ЦЖС» командасы тұрақтады. Ал үшінші орынды «Жолаушылар тасымалы» АҚ «Солтүстік» филиалының «Солтүстік» командасы иеленді. Жеңімпаз командалар арнайы дипломдармен және бағалы сыйлықтармен марапатталды. Спартакиада келесі күні шағын футболмен жалғасын тапты.