Исатай бекетінің бүгінгі тынысы
Атырау облысы бойынша меншікті тілші
Атыраудың Исатай ауданы орталығынан 83 шақырым қашықтықта орналасқан станция – қазақтың ұлт-азаттық күрескер батыры Исатай Тайманов атындағы 4-ші класты шағын бекет.
Сонау өткен ғасырдың 70-ші жылдары Атырау-Астрахань темір жолы салынған кезде құрылған станция жал-жал шағыл құмды жерде орналасқан. Сондықтан жазды күндері темір жол бойын жиі құм басып қалады. Жергілікті теміржолшылар жолды тазалап, пойыздар қозғалысын қамтамасыз етіп отыр.
Бұл исатайлықтардың бас ауруына айналған мәселенің бірі және ол туралы көптен айтылып келеді. Қайсы бір жылдары жол қапталына жыңғыл ағашын егу жөнінде ұсыныс айтылған. Дегенмен, әзірге жүзеге асқан жоқ. Станцияда мың жарымдай тұрғын тұрады, 11 жылдық мектеп, медпункт, екі балабақша бар.
Станция шағын болса да жұмысы қызу. Өйткені, өңірде Атырау-Астрахань республикалық маңыздағы тас жолының салынып жатқанына бірнеше жылдың жүзі болды, әлі бітетін түрі жоқ. Ай, апта сайын топырақ, шағыл тас, цемент, битум сынды келіп жатқан құрылыс материалдарында есеп жоқ.
Станция кезекшісі Жанбота Жұмаеваның айтуынша, тәулігіне отыздан аса жүк пойызы өтеді. Осындағы «Сине-Мидасстрой» түрік компаниясының кірме жолына 35-40 вагон жүк келіп-кетіп жатады. Одан бөлек Ресей бағытына жүретін жүк пойыздары, жолаушылар пойыздары бар. Станция ғимараты ескі болса да жарамды, көгілдір отынмен жылытылады. Шағын бекетте вагон қараушылар, байланысшы, жолшы, электрмен қамту мамандары бірлесе еңбек атқаруда.
– Станцияда екінің бірі теміржолшы кәсібін меңгеріп, отбасын асырап отыр. Темір жол мен үшін бала күнімнен таныс, ұнатқан салам, әке-шешеміздің жолын жалғастырып, осы жерде еңбек етіп келе жатқанымызды мақтан етеміз, – дейді өткен жылы Атырау жүк тасымалы бөлімшесі тарапынан «Жыл қызметкері» дипломына ие болған станция кезекшісі Жанбота Жұмаева.