Тассай станциясында биыл 2640 вагон жүк тиелді
Ақтөбе облысы бойынша меншікті тілші
Төрт облысты басып өтіп, мың шақырымды құрайтын Бейнеу – Жезқазған темір жолы бүгінде толыққанды жұмыс істеп, еліміздің транзиттік әлеуетін арттыруға үлес қосуда.
Магистраль бойында пайда болған ірілі-ұсақты станциялар дамып жатыр. Ақтөбе бөлімшесіне қарасты бір ғана Тассай станциясында биыл 2640 вагон жүк тиелді.
2014 жылдың тамызында салтанатты түрде ашылған Тассай станциясы – иен далаға жан бітірген Қазақстан темір жолының үлкен жобасы. Тәуелсіздіктің төл туындылары туралы Тассай станциясының басшысы Жігер Шыңғысов баяндап берді.
Жалпы ұзындығы 988 шақырымды құрайтын Жезқазған – Бейнеу теміржол желісі Қарағанды, Қызылорда, Ақтөбе және Маңғыстау облыстары арқылы өтеді. Соның Шалқар – Бейнеу көлік дәлізі республикаішілік көлік-экономикалық қатынастарды, елдің экспорттық байланысын ұтымды етуге, сондай-ақ транзиттік ағындардың өту жағдайларын оңтайландыруға орасан зор ықпал етуде. Жалпы, тұтас теміржол желісі республиканың барлық аймақтарындағы көлік байланыстарына оң әсерін тигізді. Қолданыстағы белгілі бір бағыттар бойынша трафиктің таралуын жақсартуға мүмкіндік беретін жаңа маршруттар құрылды. Тасымалдау қашықтығының қысқарғанын ескере отырып, бұл Орталық, Шығыс, Оңтүстік және Батыс Қазақстанның республикадағы көлік-экономикалық байланыстарына және экспорттық трафикке оң әсерін тигізді.
– Соның ішінде біздің Тассай станциясының рөлі ерекше. Жүк тасымалы жылдан жылға артып келеді. Биыл станциядан 155 мың тоннадан асатын 2640 вагон жүк тиеліп, 76 вагон жүк түсіру жұмыстары жүргізілді. Тек алпауыт мекемелер ғана емес, тұрғындар да теміржол қызметінің мүмкіндіктерін пайдалануға ұмтылуда. Әсіресе, қиыршық тас және мұнай тасымалы қарқынды. Жүк тиеу-түсіру жұмыстары жоспарға сай ұйымдастырылып отыр, – дейді Тассай станциясының бастығы Жігер Шыңғысов.
Пайдалануға берілгеніне небәрі 8 жыл болған, 11 адам жұмыс істейтін, салыстырмалы түрде жас станцияда әзірге тек теміржолшылар ғана тұрып жатыр. Заманауи үлгіде салынған 8 үй бар. Онда станция басшысынан бастап, жол дистанциясы, вагон пайдалану депосы, электрмен жабдықтау дистанциясының жұмысшылары тұрады. Жұмысшылар үшін арнайы еңбекші пойызы қатынап тұр.