Шалғай бекеттегі теміржолшылар үшін қолайлы модульдер тұрғызылуда
Ақтөбе облысы бойынша меншікті тілші
Шалқар белгі беру және байланыс дистанциясы жаңа модульдік үлгіде жабдықталған ғимараттардың игілігін көріп жүр. Шалғайдағы бекеттерде еңбек ететін теміржолшылар үшін қолайлылық арта түсті.
«Жақсыны көрмек үшін» демекші, дистанцияның шалғайдағы бекеттерінің біріне қойылған модульдік ғимаратты көзімізбен көру үшін арнайы бардық. Ұлпан станциясындағы модульдік ғимараттың мүмкіндігі де, тиімділігі де мол екенін дистанция жұмысшылары жарыса айтып жатыр. Расымен, шағын ғана үйшікте адам баласының қажеттілігі үшін барлық жағдай жасалған. Стандартты ғимараттарда ауыз су, су жылытқыш, душ, тоңазытқыш, қысқатолқынды пеш, теледидар, жаз мезгілінде салқындатқыш кондиционер тәрізді тұрмыстық қажеттіліктердің бәрі бар.
– Теміржолшылардың жағдайын жасау, әлеуметтік қолдау бірінші кезекте тұр. Ұлпан бекетіндегідей модульдік ғимараттың қазір бізде жетеуі бар. Кәдімгі үй, жатын орны да бар, жақсы жабдықталған ғимарат қатынап жұмыс істейтіндер үшін аса тиімді де қолайлы болып отыр. Өткен жылы төртеуі, биыл үшеуі келді. Электр жылытқыш қойылғандықтан қыстың ызғарлы күндерінде жып-жылы болып тұрады. Жазда желдеткіші бар. Қажетті тұрмыстық бұйымдармен толық қамтылған, жұмысшыларымыз дән риза, – дейді Шалқар белгі беру және байланыс дистанциясының бастығы Айдар Еңсепов.
Модульдік үйшіктер жұмысқа жақын жерлерге орналастырылған. Шұғыл қажет болған кезде жұмыс орнына жетуге уақыт жоғалтпайды. Ішінде байланыс жүйесі де қондырылған. Түнгі жұмыстарға шыққан кезде де барып-келуге ыңғайлы.
– Осы модульде тұрамын, барлық жағдайы бар. Бұрын қатынап істеп, туыстарымның үйінде тұрып, әуреге түсіп жүруші едім, мынау бір рахат болды, – дейді Ұлпан бекетінің электрмеханигі Азамат Нұртазин.
Теміржолшылар осыған дейін желі бойындағы елсіз жерлердегі құрылғылардың күтіміне қаншама уақыт жоғалтса, бүгінде осындай үйшіктерге қона жатып жұмыс істеу әлдеқайда тиімді екенін айтады.
Дистанция басшылығымен осындай модульдік ғимараттың 18-іне тапсырыс берген. Қазір жетеуі бар. Шалғайдан қатынап жұмыс істейтіндер үшін алдағы уақытта көбейтуді жоспарлап отыр.