Тереңөзек станциясының бүгінгі тынысы

Қызылорданың Тереңөзек станциясы үшінші класты санатқа жатқызылады. Орынбор-Ташкент күрежолының бойында жатқан станциядан әрі-бері өткінші пойыздар күні-түні бір тынбай жөңкіліп жатыр...

Жолаушы пойыздарынан Қызылорда-Павлодар-Қызылорда, Ақтөбе-Алматы-Ақтөбе, Алматы-Маңғыстау-Алматы және Орал-Алматы-Орал бағытындағы жолаушылар пойызы аялдайды. Аудан орталығы деген дардай аты бар бекетке жолаушылар пойызы тоқтамайды дегеннен тәуір. Дегенмен, станциядағы ескі теміржол вокзалының есігі тек пойыз келер алдында жарты сағатқа ғана ашылып, жолаушыларға қызмет көрсететін халге түскен. Екі билет кассирі кезектесіп жұмыс жасайды, өзге қызметкерлер құрылымдық өзгерістерге байланысты қысқартылып кеткен...  

Ал станция, өз деңгейінде жұмыс істеп, өздеріне жүктелген міндеттемелерді игеріп отыр. Транзиттік құрамдарға қызмет көрсетумен қатар келген-кеткен жүктерді дер кезінде қабылдап-жөнелтеді. Станция қызметін тұрақты пайдаланатын «Нұрдәулет» ЖК, «Саутс ойл», «Угольсбыть» сынды жергілікті мекемелер бар.  

– Өткен жылы 108 вагоннан жүк түсірдік. Тиелген жүк те аз емес. Жылдан жылға жұмыс көлемі артып келеді. Биыл да жұмыс шаш-етектен, қазір көктемгі науқандық жұмыстар басталып, тыңайтқыш, құрылыс заттары келіп түсіріліп жатыр. Тұрғындардың сұранысына қарай маусымдық жүк, көмір мен құрылыс заттары тоқтаған емес. Алдағы уақытта теміржол көлігінің қызметін пайдаланушылар саны тағы өседі деген болжам бар, аудан жылдан жылға кеңейіп жатыр, – деді станция бастығы Мұрат Маликов.  

Ауысыммен жұмыс жасайтын станция кезекшілері мен төрт жүк қабылдап тапсырушыдан бөлек шағын бекетте еңбек ететіндер қарасы көп емес. Тіпті станцияда пойыз құрастырушы штаты қысқартылғандықтан пойыздардан вагонды ажыратып, құрамға қайта тірукеу, маневрлік жұмыстарды атқару бекет басшысына жүктелген. Аз құраммен көп жұмыс тындырып отырған шағын ұжымның тірлігіне риза болып аттандық.