Арыс – теміржолшылар қаласы
Арыс-1 станциясы қаланың қақ ортасында Әділбек би мен Қазыбек би көшелерінің қиылысында орналасқан. Қаланың ең көне, экономикалық маңызды аумағы саналады және ірі теміржол мекемелері де осында орналасқан.
ҚР Президенті Қ.Тоқаевтың «Халық үніне құлақ асатын мемлекет» тұжырымдамасы пайда болғалы Арыс қаласы әкімдігі қарапайым халықтың ұсынысын тыңдауға арналған онлайн whatsapp чаттарды жіті бақылайды. Сондай чаттардың ең маңыздысын Арыс станциясы кәсіподақ комитетінің цехком төрағасы Шорахан Телқозы жүргізеді. Үш жыл бұрын құрылған чатта қала үшін маңызды мәселелер көтеріліп, шешімін тауып отыр.
– Арыс-1 вокзалына тура түсіп баратын орталық көше, Қазыбек би көшесінде Арыс қаласының орталық базары орналасқан. Қала халқын қанша мәдениетке үйретсе де, жабайы сауда қатарын өздері жасап алатын маусымдық саудагерлер мен автотұрақсыз кез келген жерге көлік қойып кете беретіндер қашанда кездеседі. Біз көтерген осы мәселеге әкімдік назар аударып, жуырда арнайы рейд жүргізілді. Оның құрамына бізді де кіргізді. Нәтижесінде базар маңынан сырттан келгендерге арнайы автотұрақ іске қосылды және жабайы сауда қатары алып тасталды. Екінші мәселе, станция мен вокзал маңындағы «Батырлар алаңының» тазалығы. Аллея маңы көпқабатты үйлер болғандықтан аумақ тұрғындары кешкі серуенге шығып, шашып кететінін айтып қала әкімі Гүлнар Мамытқызына хат жолдадық. Нәтижесінде Арыс қаласының жастарынан құралған еріктілер отрядының басшылығымен алаң апта сайын жуылып, тазаланып тұратын болды, – дейді Шорахан Телқозы.
Тағы бір мәселе, кәсіподақ бастамасымен Арыс қаласында соңғы 3 жылда түнгі ауысымнан шығатын теміржолшылар үшін арнайы таксопарктер құрылды, ал күндізгі ауысымдағылар үшін 1,2,3,4 нөмірлік бағыттағы қоғамдық автобустар саны көбейтілді және ең арзан қоғамдық көлік Арыста үлкендерге 50 теңге, оқушыларға 25 теңге болып бекітілді.
Одан бөлек, өткен жылы Арысқа кіреберіске қойылған 2 бірдей паровоз ескерткіші теміржолшылар қаласының визиткасы сынды. Ал 1 тамызға дейін саябақта «Құрметті теміржолшылар» тақтасы ашылады деп күтілуде.
