Жаңаесілдің жұмысы жандануда
«Қазақстан теміржолшысы» газетінің тілшісі
Тоғыз жолдың торабында орналасқан кластан тыс Жаңаесіл станциясынан өткен жылы 196 контейнерлік пойыз Алтынкөл – Достық теміржолы арқылы Қытайға тиелді. Биыл 4 айда экспортқа осы бағытта 86 контейнерлік пойыз астық жөнелтілді.
Үш бағытта пойыздар қозғалысы қалыптасқан станциядан одан бөлек транзиттік жүк және жолаушылар тасымалы өтеді. Қазақстан бойынша да жүк тасымалын ұйымдастыруда станциядағы барлық құрылымдар ауызбіршілікпен жұмыс істеп, ел темір жолының дамуына табанды еңбегімен атсалысып келеді. Жаңаесіл станциясының бастығы Ерлан Рахимжановтың айтуынша, станциядағы тынымсыз тірлік тоқтаусыз, себебі күре жолдың бойындағы станция қызметінің орны бөлек. Бұл жерден Қостанай, Преснягорковка және Көкшетау бағытына үш жол қозғалысы бар. Сол жолдармен станцияны басып өтіп, тәулігіне 38 жүк пойызы, 6 жолаушылар пойызы жүреді. Былтыр Қазақстан бойынша станциядан 11 865 вагон жүк тиелсе, Орта Азияға 8 237, Ресейге 1 594, Әзірбайжанға 276, Латвияға 333, Беларусьқа 9 пойыз жіберілген.
Сонымен қатар станцияда құрама жем зауыты салынып жатыр. Оның жұмысы басталғанда станциядан тиелетін жүктер саны арта түседі. Осындай ауқымды жұмысты атқарып, жүк пен жолаушылар тасымалының қауіпсіз қозғалысын ұйымдастырып отырған станцияда 110 адам еңбек етеді. Жалпы торапта ПЧ, ШЧ, ТЧ, ЭЧ мекемелерінің және басқа да сала жұмысшыларын қосқанда 1 175 теміржолшы бар. Сипаты бойынша жергілікті болып саналатын станция 24 темір жолдан тұрады, оның 9-ы жүк пойызын қабылдауға және жөнелтуге, 14 жол пойыздарды сұрыптауға арналған. Одан бөлек 44 кірме жолы да бар.
– 2024 жылы жүк тиеуге берілген жоспар 21 220 вагон еді, ал нақты тиелген жүк жоспардан тыс 24 045 болды. Биыл төрт ай қорытындысы бойынша жүк тиеуге берілген жоспар 24 075 вагон болса, жоспардан тыс 23 890 вагон тиеліп отыр. Бұл дегеніміз берілген жұмыс жоспардан тыс 100% орындалуда деген сөз. Өткен жылы жүк түсіруге берілген жоспар 15 533 вагон болған, ал нақты 15 786 вагон жүк түсірілді, осы жылдың төрт айында 11 617 вагон жүк түсіріліп отыр. Мұның бәрі станциядағы қарапайым теміржолшылардың күнделікті қажырлы еңбегінің арқасында атқарылып отыр. Сондықтан олардың әлеуметтік жағдайын жасап, техникалық сабақта білімін көтеруге жағдай жасалады, – дейді Жаңаесіл станциясының бастығы Ерлан Рахимжанов.
Қазіргі таңда Жаңаесіл станциясының вокзалына күрделі және дөңеске ағымдағы жөндеу жұмыстары жүргізіліп жатыр. Көп ұзамай жаңаесілдік теміржолшылар жаңаша сипат алған вокзалда жұмыс істейтін болады.